Xəbərlər
Yunanıstanın Azərbaycandakı səfiri “Azərikimya” İstehsalat Birliyində olub
Azərbaycan Respublikası Dövlət Neft Şirkətinin “Azərikimya” İstehsalat Birliyində Yunanıstan Respublikasının ölkəmizdəki səfiri Dimitrios Tsounqas ilə görüş keçirilib.
Birliyin mətbuat xidmətindən bildirilib ki, qonağı səmimi salamlayan, Yunanıstanın Azərbaycan üçün iqtisadi tərəfdaş və dost ölkə olduğunu vurğulan “Azərikimya” İstehsalat Birliyi Müşahidə Şurasının sədri, Milli Məclisin deputatı Muxtar Babayev Azərbaycan neft-kimya sənayesinin inkişaf mərhələləri, “Azərikimya”nın bir çox istehsalat sahələrində aparılan yeniləşmə və bərpa işləri barədə ətraflı məlumat verib. O, eyni zamanda, karbamid zavodunun tikintisinin vəziyyəti və sənaye zonasında yaradılan Sumqayıt Kimya Sənaye Parkı haqqında danışdı, iki ölkə arasında iqtisadi münasibətlərin genişləndirilməsi istiqamətində son vaxtlar atılan mühüm addımları diqqətə çatdırıb.
Səfir Dimitrios Tsounqas səmimi görüşə görə “Azərikimya” İstehsalat Birliyinin rəhbərliyinə minnətdarlığını bildirib. Diplomat Yunanıstan və Azərbaycan respublikaları arasındakı qarşılıqlı faydalı əməkdaşlıqdan geniş söhbət açaraq, iqtisadi, sənaye, texnologiya, enerji, elm, təhsil, mədəniyyət, turizm, nəqliyyat, gömrük və digər sahələrdə əlaqələrin genişləndirilməsi üçün yeni imkanların yarandığını vurğulayıb.
Sonra qonaq “Azərikimya” İstehsalat Birliyində yaradılmış Heydər Əliyev guşəsini ziyarət edib, Sumqayıt şəhər stadionuna, “Kimyaçı” poliklinikasına, həmçinin Sumqayıt Təlim, Tədris Mərkəzinə baş çəkərək, şəhərin idman həyatı, kimyaçılara göstərilən tibbi xidmət və gənc ixtisaslı fəhlə kadrların hazırlanmasının vəziyyəti ilə tanış olub.