Xəbərlər
Şahin İsmayılov: Gənclər təşkilatlarının gəncliyimizin inkişafına yönəldilmiş fəaliyyəti dövlət tərəfindən böyük dəstək görür
«Azərbaycan gəncliyinin inkişafı ilə bağlı qəbul olunan Dövlət proqramlarında öz əksini tapmış müddəaların icrası, ümumilikdə Azərbaycan gənclərinin fəallaşması, onların ictimai aktivliyinin və eyni zamanda, gənclər təşkilatlarının işinin səmərəliliyinin artması ilə nəticələnib». Bu fikri Milli Məclisin deputatı, Azərbaycan Tələbə Gənclər Təşkilatları İttifaqının sədri Şahin İsmayılov deyib.
Ş.İsmayılov bildirib ki, bu gün gənclər təşkilatlarının gəncliyimizin inkişafına yönəldilmiş fəaliyyəti, təşəbbüs və layihələri dövlət tərəfindən böyük dəstək görür. Onun sözlərinə görə, yürüdülən uğurlu gənclər siyasətinin nəticəsidir ki, ölkəmizdə millətinə, xalqına faydalı olan, milli-mənəvi dəyərlərimizə sadiq, Ulu öndərimizin azərbaycançılıq ideyasını davam və inkişaf etdirən, bilikli, bacarıqlı və dünyada ölkəmizi layiqincə təmsil etməyə qadir olan Azərbaycan gəncliyi yetişib.
«Gənclərimiz ölkənin iqtisadi, siyasi, elmi həyatında öz sözlərini deyir və əməli işləri ilə bunu təsdiqləyirlər. Azərbaycanı dünyanın bir çox ölkələrində təmsil edən, haqq səsimizi dünya ictimaiyyətinə çatdıran və Dağlıq Qarabağ probleminin Azərbaycanın ərazi bütövlüyü çərçivəsində həllinə səylə çalışan gənclərimiz var. Onlar Ali Baş Komandanımızın yürütdüyü siyasətə hərtərəfli dəstək olurlar»- deyə, Ş.İsmayılov qeyd edib.