Xəbərlər
Xalqlarımız əsrlər boyu qardaşlıq şəraitində yaşayıb
Fəxrəddin Vəliyev
YAP Şəmkir rayon təşkilatının sədri
Aprelin 28-də İran İslam Respublikasının Prezidenti Məsud Pezeşkian ölkəmizdə rəsmi səfərdə oldu. Mətbuata bəyanatında “Sizi Azərbaycanda bir daha səmimiyyətlə salamlayıram, Azərbaycana xoş gəlmisiniz. Əminəm ki, Sizin səfəriniz Azərbaycan-İran dostluq, qardaşlıq münasibətlərinin inkişafına öz dəyərli töhfəsini verəcək” söyləyən dövlət başçısı İlham Əliyev onu da bildirdi ki, xalqlarımız əsrlər boyu mehribanlıq, qardaşlıq şəraitində yaşayıb. Bu gün dövlətlərarası münasibətlərimiz bu möhkəm təməl üzərində inkişaf edir. İran Prezidentinin Azərbaycana rəsmi səfəri əlaqələrimizin yüksək səviyyədə olmasının təzahürüdür.
Aparılan danışıqlar və fikir mübadiləsi əsnasında Azərbaycan-İran strateji münasibətləri bir daha təsdiqləndi. Əsas məsələ ondan ibarətdir ki, hər iki tərəf Azərbaycan-İran əlaqələrinin inkişafına çalışır. İran Prezidentinin böyük heyətlə Azərbaycana gəlməsi və bir çox önəmli sənədlərin imzalanması, o cümlədən prezidentlər səviyyəsində imzalanmış sənəd bir daha iki ölkənin xoş niyyətini göstərir. Azərbaycan və İran beynəlxalq təşkilatlar çərçivəsində bir-birini ənənəvi olaraq dəstəkləyir. İstər BMT, istər İslam Əməkdaşlıq Təşkilatı, ECO, Qoşulmama Hərəkatı və digər təşkilatlar çərçivəsində daim bir-birinin yanındadırlar.
İki ölkənin əlaqələrinin gündəliyi genişdir. Burada həm regional təhlükəsizlik məsələləri, eyni zamanda, çoxtərəfli əməkdaşlıq önəmli rol oynayır. Dövlət başçısı İlham Əliyev mətbuata bəyanatında bir daha bildirdi ki, məramımız, məqsədimiz birdir - Azərbaycan-İran dövlətlərarası əlaqələri yüksək səviyyəyə qaldırılsın. Bunun üçün müvafiq göstərişlər verildi. O da qeyd edildi ki, İran Prezidentinin səfərinə qədər çox fəal təmaslar həyata keçirildi, yüksəkvəzifəli şəxslər qarşılıqlı səfərlər etdilər. Bu əminlik ifadə edildi ki, qəbul edilmiş qərarlar əlaqələrimizi uzun illər bundan sonra yüksələn xətlə aparacaq.
Səfər çərçivəsində üçtərəfli əməkdaşlıq layihələri də geniş müzakirə edildi. Onların arasında təbii olaraq Şimal-Cənub nəqliyyat dəhlizi xüsusi yer tutur. Bu layihə iştirakçı olan bütün ölkələrə çox böyük səmərə gətirəcək, fayda verəcək. Azərbaycan öz ərazisində bu nəqliyyat dəhlizinin fəaliyyəti üçün bütün lazımi infrastruktur layihələrini həyata keçirib. Hazırda ölkəmiz artacaq yükləri nəzərə alaraq öz nəqliyyat imkanlarını və infrastrukturu genişləndirir.
Prezident İlham Əliyev “Mən heç şübhə etmirəm ki, bu səfər bizim münasibətlərimizin inkişafında çox önəmli rol oynayacaq. Biz Prezident Pezeşkianı səbirsizliklə gözləyirdik” fikirləri ilə səfərin iki ölkənin münasibətlərinin daha da möhkəmlənməsində rolunu təsdiqlədi: “Mən yenə də Prezident Pezeşkiana “Xoş gəlmisiniz!” deyirəm, mənim dəvətimi qəbul edib Azərbaycana səfər etdiyi üçün təşəkkürümü bildirmək istəyirəm. Onunla birlikdə gələn bütün qonaqlarımıza da “Xoş gəlmisiniz!” deyirəm. Əminəm ki, səfəriniz uğurlu, nəticələr də çox gözəl olacaq”.
Qeyd edək ki, İran İslam Respublikası Azərbaycan Respublikasının müstəqilliyini 25 dekabr 1991-ci ildə tanımışdır. İki ölkə arasında diplomatik əlaqələr 12 mart 1992-ci ildə qurulmuşdur. Hər iki ölkənin səfirlikləri (1969-cu ildə İranın Bakı şəhərində açılmış konsulluğu 1992-ci ilin mart ayından İran İslam Respublikasının Azərbaycan Respublikasındakı səfirliyi kimi fəaliyyətini davam etdirir. 1992-ci ilin dekabr ayında isə Azərbaycan Respublikasının İran İslam Respublikasında səfirliyi fəaliyyətə başlamışdır), İranın Naxçıvan şəhərində Baş Konsulluğu (1992-ci ilin mart ayından), Azərbaycan Respublikasının Təbriz şəhərində Baş Konsulluğu (20 oktyabr 2004-cü ildən) fəaliyyət göstərir. Azərbaycan İran İslam Respublikası ilə hər iki tərəfdən güclü siyasi iradənin mövcudluğu təməl olmaqla, mehriban qonşuluq, bərabərhüquqluluq, qarşılıqlı hörmət və faydaya əsaslanan əlaqələrin inkişafına önəm verir. Xalqlar arasında tarixi və mədəni bağlılıqlar iki ölkə arasında münasibətlərin bütün sahələr üzrə inkişafı üçün zəmin yaradır və bu gün ikitərəfli əlaqələrimiz ticarət-iqtisadi, enerji, energetika, nəqliyyat logistika, kənd təsərrüfatı, humanitar və digər sahələr üzrə inkişaf edir.