Xəbərlər
YAP-ın deputatlığa namizədi Hikmət Babaoğlu Nərimanov rayonunun rus icmasının nümayəndələri ilə görüşüb
Parlament seçkilərinin təbliğat-təşviqat kampaniyası çərçivəsində Yeni Azərbaycan Partiyasının 19 saylı Nərimanov birinci Seçki Dairəsindən deputatlığa namizədi, "Yeni Azərbaycan" qəzetinin baş redaktoru Hikmət Babaoğlu dünən Nərimanov rayonunun rus icmasının nümayəndələri ilə görüşüb. Tədbiri giriş sözü ilə açan YAP Nərimanov rayon təşkilatının sədri Təmraz Tağıyev partiyamızın bu seçkilərdə də qələbə qazanacağına əmin olduğunu bildirib.
Sonra Azərbaycanda rus icmasının Nərimanov rayon nümayəndəliyinin rəhbəri Lidiya Hacıyeva görüş iştirakçılarını noyabrın 1-də seçki məntəqələrinə gəlməyə və YAP-ın namizədi Hikmət Babaoğluna səs verməyə çağırıb.
YAP-ın 19 saylı Nərimanov birinci Seçki Dairəsindən deputatlığa namizədi, "Yeni Azərbaycan" qəzetinin baş redaktoru Hikmət Babaoğlu görüşdə çıxış edərək bildirib ki, bu gün Azərbaycan millətlərarası və dinlərarası dialoq baxımından dünyada nümunəvi bir ölkədir.
Milli Məclisin hakimiyyətin mühüm qollarından biri olduğunu deyən deputatlığa namizəd parlamentdə təmsil olunmağın məsuliyyətli olduğunu vurğulayıb.
Sonda deputatlığa namizəd Hikmət Babaoğlu görüş iştirakçılarının arzu və istəklərini, təkliflərini dinləyib.
