Xəbərlər
“Aprel döyüşləri – Vətən müharibəsinin baş məşqi”
Aprelin 4-də Yeni Azərbaycan Partiyası (YAP) Qaradağ rayon təşkilatının və Qaradağ rayon Heydər Əliyev Mərkəzinin birgə təşkilatçılığı ilə “Aprel döyüşləri – Vətən müharibəsinin baş məşqi” mövzusunda tədbir keçirilib.
Əvvəlcə Ulu Öndər Heydər Əliyevin Mərkəzin qarşısında ucaldılmış abidəsi önünə gül dəstələri qoyulub, dahi şəxsiyyətin əziz xatirəsi ehtiramla anılıb.
Tədbirdə Ulu Öndər Heydər Əliyevin, Azərbaycanın ərazi bütövlüyü və suverenliyi uğrunda canlarını qurban vermiş şəhidlərin əziz xatirəsi bir dəqiqəlik sükutla yad edilib.
Sonra Aprel döyüşlərinə həsr edilən videoçarx nümayiş etdirilib.
Tədbiri giriş sözü ilə açan YAP Qaradağ rayon təşkilatının sədri Qafar Əliyev Aprel döyüşlərinin hərbi-siyasi əhəmiyyətindən bəhs edib. Bildirib ki, 2016-cı ilin aprelində Ermənistan silahlı qüvvələrinin təxribatlarına cavab olaraq keçirilən hərbi əməliyyat zamanı qazanılmış qələbə, Zəfər tariximizin başlanğıcıdır. Aprel döyüşləri ordumuzun gücünü, xalqımızın mübariz ruhunu bütün dünyaya göstərdi. Uğurlu əməliyyatlar nəticəsində Talış kəndi istiqamətindəki yüksəkliklər işğalçılardan təmizləndi. Horadiz şəhərinin düşmən təhlükəsindən qorunması məqsədilə Füzuli rayonu istiqamətində yerləşən, olduqca strateji əhəmiyyətli Lələtəpə yüksəkliyi azad edildi. Ağdərə-Suqovuşan istiqamətində yolların nəzarətdə saxlanılması təmin olundu. 2020-ci ildə Vətən müharibəsi, 2023-cü ildə antiterror tədbirləri ilə Azərbaycan öz ərazi bütövlüyünü, tarixi ədaləti və dövlət suverenliyini tam bərpa edib.
Qaradağ Rayon İcra Hakimiyyətinin İctimai-siyasi və humanitar məsələlər şöbəsinin müdiri, “91-lər”dən Munis Bayramov Aprel döyüşlərinin Azərbaycanın hərb tarixində xüsusi yer tutduğunu vurğulayıb. Tarixə ekskurs edərək ermənilərin bütün türk dünyasına və digər xalqlara qarşı düşmənçilik mövqeyindən, “Böyük Ermənistan” xülyası ilə yerli xalqlara qarşı amansız qətliamlar törətməsindən bəhs edib. Aprel döyüşlərində başlanğıcı qoyulan Böyük Zəfər nəticəsində bu xəyalpərəstlərin boş xülyalarının iflasa uğradığını diqqətə çatdırıb.
Sabiq korpus komandiri, polkovnik, iki dəfə “Azərbaycan Bayrağı” ordeni ilə təltif edilmiş Şair Ramaldanov Azərbaycan Ordusunun I Qarabağ müharibəsində məğlubiyyəti, Aprel döyüşlərinin baş vermə səbəbləri, bu döyüşün hərbi-texniki nəticələri barədə ətraflı məlumat verib. Bildirib ki, Aprel döyüşləri I Qarabağ müharibəsindən sonra cəbhədə baş verən dönüşün başlanğıcı olmaqla yanaşı, Böyük Zəfərlə başa çatan Vətən müharibəsinin baş məşqi kimi xüsusi əhəmiyyətə malikdir. “Heç nə unudulmur və heç nə yaddan çıxmır”, - deyə vurğulayan polkovnik Ş.Ramaldanov Azərbaycan xalqının öz tarixi keçmişinə böyük diqqətlə yanaşmasının, belə tədbirlərin tez-tez təşkil edilməsinin əhəmiyyətindən danışıb.
Tədbirdə çıxış edən Qaradağ rayon Heydər Əliyev Mərkəzinin direktoru Çərkəz Əliyeva, Müdafiə Nazirliyinin əməkdaşı polkovnik-leytenant Cabir Bəxtiyarov, Sərhəd Qoşunlarının nümayəndəsi, polkovnik-leytenant Rəsul Zülfüqarov, Şəhid anası Fəridə İsmayılova və digərləri Aprel döyüşlərinin tarixi əhəmiyyətindən, onun gənc nəslin vətənpərvərlik tərbiyəsindəki rolundan, bu qəhrəmanlıq salnaməsinin gələcək nəsillərə ötürülməsinin vacibliyindən bəhs ediblər. Aprel döyüşlərinin Azərbaycan xalqının yaddaşında əbədi yaşayacağını vurğulayıblar.
Sonra Yeni Azərbaycan Partiyasının sıralarına yeni qoşulanlara üzvlük vəsiqələri təqdim edilib.
Sonda xatirə fotosu çəkdirilib.
