Xəbərlər
Azərbaycan-Almaniya tərəfdaşlığı: geosiyasi reallıqlar və yeni iqtisadi imkanlar
Mahir Süleymanlı
Milli Məclisin deputatı
Azərbaycan və Almaniya arasında inkişaf edən siyasi tərəfdaşlıq son illərdə daha da möhkəmlənmiş və əhatəli bir xarakter almışdır. Xüsusilə Almaniya Federativ Respublikası Prezidenti Frank-Valter Ştaynmayerin Azərbaycana rəsmi səfəri bu əlaqələrin əhəmiyyətini bir daha nümayiş etdirir. Bu səfər iki ölkə arasında münasibətlərin daha da güclənməsinə və qarşılıqlı faydalı əməkdaşlığın yeni istiqamətlərinin formalaşmasına töhfə vermişdir.
Almaniya və Azərbaycan arasında diplomatik əlaqələr 1992-ci ildə qurulmuşdur. Hər iki dövlətin paytaxtında səfirliklərin fəaliyyət göstərməsi və ardıcıl diplomatik görüşlər ikitərəfli əlaqələrin mühüm önəm kəsb etdiyini göstərir. Prezident Frank-Valter Ştaynmayerin səfəri, xüsusilə diplomatik münasibətlərin daha da inkişaf etdirilməsi üçün yeni imkanlar yaratmışdır. Bu səfər həm də bir çox mühüm məsələlərin müzakirə olunmasına və gələcək əməkdaşlıq istiqamətlərinin müəyyənləşdirilməsinə şərait yaratmışdır. İkitərəfli diplomatik əlaqələrin inkişafı, həmçinin işgüzar müzakirələr, mədəniyyət və təhsil sahələrində əməkdaşlıqla da dəstəklənir.
Prezident İlham Əliyev mətbuata bəyanatında bu səfərin çox müsbət nəticələri olacağını diqqətə çatdırıb: “İkitərəfli münasibətlərimizin tarixində bu, Almaniya Prezidentinin Azərbaycana birinci rəsmi səfəridir. Əminəm ki, səfərin yekunları bizim ölkələrimizi bir-birinə daha yaxın edəcəkdir”.
Avropada Azərbaycanın əsas ticarət tərəfdaşlarından biri olan Almaniya ilə cari ilin ilk iki ayında ticarət dövriyyəsinin üç dəfə artması bu əməkdaşlığın yüksələn xətlə inkişaf etdiyini sübut edir. Bunun əsas səbəbi Azərbaycandan Almaniyaya ixrac edilən xam neftin həcminin artması olmuşdur, lakin ticari əlaqələrin şaxələndirilməsi, xüsusən qeyri-neft sektoru üzrə əməkdaşlıq hər iki ölkə üçün strateji əhəmiyyət daşıyır. Almaniyanın texnoloji sahədə inkişaf etmiş şirkətləri ilə əməkdaşlıq Azərbaycan iqtisadiyyatının modernləşdirilməsində mühüm rol oynaya bilər. Həmçinin, bərpaolunan enerji sahəsində dövlətlərarası təcrübə mübadiləsi və birgə layihələrin həyata keçirilməsi bu sahənin inkişafını sürətləndirəcək. Azərbaycan 2030-cu ilə qədər bərpaolunan enerji istehsalını 6 giqavata çatdırmağı hədəfləyir, bu məsələdə Almaniya şirkətlərinin sərmayələri və texnoloji dəstəyi mühüm önəm kəsb edir.
COP29 tədbirinin Azərbaycanda keçirilməsi ekoloji siyasət və iqlim dəyişikliyi ilə mübarizədə yeni imkanlar yaratmışdır. Almaniya bu konfransda aktiv rol oynamış və bərpaolunan enerji sahəsində ölkəmizlə mütəmadi əməkdaşlıq qurmuşdur. Bu konfransda 197 ölkə iştirak etmiş və 77 mindən çox iştirakçı qeydiyyatdan keçmişdir. Konfrans qlobal ekoloji problemlərin həlli üçün geniş platforma təqdim etmiş və dövlətlər arasında əməkdaşlıq müzakirələrinin aparılmasına yol açmışdır. Almaniya ilə ekoloji səmərəliliyin artırılması istiqamətində görülən işlər, həmçinin iqlim dəyişikliyi ilə mübarizədə geniş əməkdaşlıq əlaqələri qurulmasına zəmin yaratmışdır. Bu, həmçinin Azərbaycan üçün beynəlxalq ekoloji siyasətdə daha fəal iştirak etmək və ətraf mühitin qorunması istiqamətində yeni tədbirlər həyata keçirmək üçün mühüm bir addım olmuşdur.
İki ölkənin beynəlxalq müstəvidəki rolunu nəzərə alaraq, bu tərəfdaşlıq qlobal və regional təhlükəsizlik məsələlərinə müsbət təsir göstərir. Almaniya Azərbaycanın Avropada strateji əhəmiyyətini tanıyan bir tərəfdaş olaraq, ölkəmizin təhlükəsizlik sahəsindəki mövqeyini dəstəkləyir. Ermənistan-Azərbaycan münaqişəsinin həlli və post-münaqişə dövründə sülhün bərqərar olması məsələsində Almaniya diplomatik vasitəçi kimi fəaliyyət göstərərək mühüm rol oynayır.
Almaniya və Azərbaycan arasında diplomatik, iqtisadi və ekoloji əlaqələrin dərinləşməsi iki dövlət arasında tərəfdaşlığın yeni bir mərhələsini təşkil edir. Xüsusilə enerji sektorunda – bərpaolunan enerji mövzusunda işlərin aparılması, COP29 konfransının nəticələri və ticarətin şaxələndirilməsi Almaniya-Azərbaycan tərəfdaşlığının geosiyasi və iqtisadi səviyyədə daha da güclənəcəyini göstərir. Həmçinin, bu əməkdaşlıq hər iki ölkənin beynəlxalq münasibətlərdə daha da yaxınlaşmasına və qlobal təhlükəsizliyin təmin edilməsində mühüm rol oynamasına şərait yaradacaqdır.