Xəbərlər
YAP Nərimanov rayon təşkilatının yaranmasının 32 illiyi qeyd edilib
Yeni Azərbaycan Partiyası (YAP) Nərimanov rayon təşkilatının yaradılmasının 32 illiyinə həsr olunmuş tədbir keçirilib.
Əvvəlcə tədbir iştirakçıları Ümummilli Lider Heydər Əliyevin abidəsi önünə gül dəstələri düzüb, Ulu Öndərin xatirəsinə dərin ehtiram ifadə ediblər.
Tədbirdə çıxış edən YAP Nərimanov rayon təşkilatının sədri Elçin Quliyev dahi şəxsiyyət Heydər Əliyevin yaradıcısı olduğu, bu gün Prezident İlham Əliyevin uğurla rəhbərlik etdiyi Yeni Azərbaycan Partiyasının nəinki ölkəmizin, bütövlükdə Cənubi Qafqaz regionunun aparıcı siyasi təşkilatı kimi tanındığını və nüfuz qazandığını deyib. Onun sözlərinə görə, YAP qısa müddət ərzində Azərbaycan xalqının iradəsi əsasında hakimiyyətə gəlib, yeni Azərbaycan quruculuğunu təmin edərək ümumxalq partiyasına çevrilib. Ümummilli Liderin ideyaları və zəngin dövlətçilik irsi əsasında inkişaf yolunda inamla addımlayan müstəqil Azərbaycan bu gün Prezident İlham Əliyevin rəhbərliyi ilə yeni strateji nailiyyətlərə müvəffəq olur.
Görüşdə Milli Məclisin deputatları YAP İdarə Heyətinin üzvü Hikmət Babaoğlu və Samir Vəliyev çıxış edərək zamanın tələbi, xalqın istəyi ilə yaranan və qısa müddətdə ümumxalq partiyasına çevrilən Yeni Azərbaycan Partiyasının bütün uğurlarının arxasında xalqın inamı və bu inamdan irəli gələn dəstəyin dayandığını qeyd ediblər.
Çıxışlarda şərəfli inkişaf yolu keçən Yeni Azərbaycan Partiyasının ölkəmizin ictimai-siyasi həyatında aparıcı rol oynadığı, sıralarını ildən-ilə genişləndirdiyi xüsusi vurğulanıb.
