YENİ AZƏRBAYCAN PARTİYASI

Yeni Azərbaycan Partiyasının (YAP) təsis edilməsinin 32-ci ildönümü münasibətilə partiyanın Xətai rayon təşkilatında dəyirmi masa keçirilib.

Əvvəlcə tədbir iştirakçıları tərəfindən Ümumilli Lider Heydər Əliyevin və vətənimizin ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.

Tədbiri giriş sözü ilə açan YAP Xətai rayon təşkilatının sədri Ramil Mirzəyev zəmanəmizin ən nüfuzlu partiyası olan YAP-ın keçdiyi 32 illik yol haqqında dəyirmi masa iştirakçılarına məlumat verib.

O bildirib ki, Yeni Azərbaycan Partiyası Azərbaycan tarixinin son dərəcə ağır və keşməkeşli günlərində, ölkənin ciddi sınaqlara məruz qaldığı bir dövrdə Azərbaycan ziyalılarının təşəbbüsü və fəal iştirakı ilə yaranmışdır. Azərbaycanın taleyini düşünən insanlar ölkəni böhrandan çıxara biləcək yeni bir partiya yaratmaq təşəbbüsü ilə çıxış etdilər və bu məqsədlə Ulu Öndər Heydər Əliyevin ətrafında birləşdilər. Azərbaycanın ən yeni tarixinə “91-lər”in müraciəti kimi daxil olmuş sənəd əslində, bütün xalqın arzu və istəklərinin ifadəsi idi. Xalqın istəyini nəzərə alaraq Ulu Öndərə müraciət edən məşhur “91-lər”in cəsarətli addımları nəticəsində dağıdıcı proseslərin qarşısı alındı. Azərbaycanın görkəmli ziyalıları, tanınmış insanları və nüfuzlu şəxsiyyətlərinin imzaladıqları müraciətdə Ümummilli Lider Heydər Əliyevdən yeni yaradılacaq siyasi partiyaya rəhbərlik etmək xahiş olunurdu. 

Yeni Azərbaycan Partiyasının təsis konfransı 21 noyabr 1992-ci il tarixində Naxçıvanda ölkəmizin bütün regionlarını təmsil edən və 550 nəfərdən ibarət olan təşəbbüs qrupunun iştirakı ilə keçirildi. Təsis konfransı Yeni Azərbaycan Partiyasının yaradılması haqqında qərar, partiyanın Nizamnaməsini və Proqramını qəbul etdi. Konfransda Ulu Öndər Heydər Əliyev yekdilliklə partiyanın sədri seçildi. Beləliklə, müstəqil Azərbaycanın tarixində öz üzərinə böyük tarixi missiya götürən Yeni Azərbaycan Partiyası yarandı.

Ulu Öndər Heydər Əliyevin yaratdığı partiya ötən illər ərzində ölkəmizdə siyasi sabitliyin və davamlı inkişafın təminatçısı kimi çıxış etmişdir. Qısa müddət ərzində ümumxalq partiyasına çevrilmiş Yeni Azərbaycan Partiyası yarandıqdan bu günə qədər çox böyük, şərəfli və uğurlu yol keçmişdir. Yeni Azərbaycan Partiyasının 2005-ci il 26 mart tarixində keçirilmiş III qurultayında Partiyanın yeni sədri – Azərbaycan Respublikasının Prezidenti cənab İlham Əliyev seçildi. Bununla da, partiyanın yeni inkişaf mərhələsinin başlanğıcı qoyuldu. İqtisadi inkişaf, sosial təminatın güclənməsi, beynəlxalq nüfuzunun artması bizi hədəflərimizə daha da yaxınlaşdırdı. Xalqın milli birliyi əsas hədəfimiz olan Qarabağ və Şərqi Zəngəzurun işğaldan azad olunmasında mühüm rol oynadı.  

Ölkəmizdə keçirilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) göstərilən beynəlxalq diqqət, Bakıya yüksək səviyyədə edilən səfərlər, səsləndirilən bəyanatlar da düzgün yolda olduğumuzu, hədəfimizin dəqiq və aydınlığını göstərir.

Vətən müharibəsində əldə etdiyimiz tarixi Zəfər və postmüharibə dövründə fəaliyyətimizi möhtəşəm Qələbəyə layiq şəkildə qurmağımızdır. İşğal olunmuş torpaqlarımızın Müzzəfər Ali Baş Komandan İlham Əliyevin rəhbərliyi ilə erməni faşizminin tapdağından azad olunması xalqın böyük sevincinə səbəb oldu. Dövlət başçımız tarixi Zəfərdən sonra sülh təklifləri ilə çıxış etdi, Qarabağ və Şərqi Zəngəzurda tikinti-quruculuq işləri həyata keçirilməkdədir.

Azərbaycan iqtidarı bütün islahatları ardıclıqla icra edir. YAP öz təşəbbüsləri sayəsində partiyalararası siyasi dialoqu stimullaşdırır. Ölkəmizdə aparılan siyasi dialoq təcrübəsi YAP-ın təşəbbüsləri ilə zənginləşir”- deyə, Ramil Mirzəyev bildirib.  

Tədbirdə çıxış edən kimya elmləri doktoru, professor Əfsun Sucayev qeyd edib ki, Azərbaycanın hakim partiyası olan Yeni Azərbaycan Partiyasının yaradılmasından 32 il ötür: “Tarixi xranologiyaya  nəzər yetirsək görərik ki, Partiyanın yaradılması elə bir dövrə təsadüf edirki, o zaman Azərbaycan ikinci dəfə öz müstəqilliyini itirmək təhlükəsi ilə üz-üzə idi. Azərbaycan və Ermənistan müahribəsi ilə yanaşı daxildə də vətəndaş müharibəsi ilə qarşı-qarşıya qalmışdıq. Azərbaycan parcalanmaq təhlükəsi var idi. Belə bir dönəmdə Yeni Azərbaycan Partiyasının yaradılması ölkənin taleyində mühüm rol oynadı. Yaranan partiya daim yeniləşən Azədbaycan naminə ideyasını özünə əsas istiqamət seçdi”.  

Milli Məclisin deputatı Pərvanə Vəliyeva çıxışı zamanı tarixə nəzər yetirərək bildirib ki, “91”lər adlanan ziyalı şəxslərimiz  yalnız öz istəklərini deyil, Azərbaycan xalqının istəklərini əks etdirən müraciət ünvanladı: “Bundan sonra Azərbaycan yükəsələn xətlə inkişaf etdi. Bu Azərbaycan üçün dönüm nöqtəsi idi”.  Millət vəkili qeyd edib ki, Azərbaycanın COP29-a ev sahibliyi etməsi də keçdiyimiz böyük inkişaf yolunun göstəricisidir.  

Çıxış edən Xətai Rayon İcra Hakimiyyəti başçısının müavini Etibar Əhmədov Yeni Azərbaycan Partiyasının yaradılması ilə bağlı olan xatirələrini bölüşərək, müdrik Azərbaycan xalqının Ulu Öndəri seçərək dövlətin gələcək inkişafının təməlini qoyduğunu bildirib.  

Xətai Rayon İcra Hakimiyyətinin şöbə müdiri Pənah İmanov Azərbaycanın bugünki inkişafından bəhs edərək, ölkə başçısı İlham Əliyevin Ulu öndərin yolunu layiqincə davam etdirdiyini vurğulayıb.  

Çıxış edən Heydər Əliyev adına liseyin direktoru Sevinc Orucova və “ASAN xidmət” Mərkəzinin əməkdaşı, şəhid bacısı Ülkər Məmmədzadə də YAP-ın ölkənin inkişafındakı mühüm rolunu qeyd ediblər.  

Daha sonra YAP üzvü olan bir qrup partiya fəalı Fəxri Fərman və qiymətli hədiyyələrlə mükafatlandırıldı, Yeni Azərbaycan Partiyasının sıralarına qəbul olunmuş yeni üzvlərə partiya vəsiqələrin təqdim olundu.  

Sonda tədbir iştirakçıları birgə xatirə şəkli çəkdirdilər.