YENİ AZƏRBAYCAN PARTİYASI

Asif Əsgərov

Milli Məclisin deputatı

1990-cı illərin əvvəllərində ölkəmizdə vəziyyət olduqca mürəkkəb idi. Müstəqilliyin bərpasından sonra Azərbaycanda qeyri-sabitlik, iqtisadi çətinliklər və Dağlıq Qarabağ münaqişəsi ilə bağlı ciddi gərginliklər hökm sürürdü. Bu şəraitdə, ölkəni idarə edən qüvvələr xalqın maraqlarını təmin etməkdə çətinlik çəkirdi və nəticədə ictimai-siyasi sferada gərginlik artmışdı.

Belə bir dövrdə, Azərbaycanın gələcək taleyindən narahat olan ziyalılar və tanınmış şəxsiyyətlər Ulu Öndər Heydər Əliyevə müraciət etdilər. Bu müraciət Azərbaycanın siyasi həyatında xüsusi əhəmiyyət kəsb edən bir sənəd kimi tarixə düşdü və məşhur “91-lər” tərəfindən imzalandı. “91-lər”in Ümummilli Lider Heydər Əliyevə müraciəti, ölkənin gələcəyini təhlükə altında görən və xalqın rifahının yaxşılaşdırılması üçün yeni bir liderə ehtiyac olduğunu anlayan insanlar tərəfindən hazırlanmışdı. Onlar Heydər Əliyevin siyasi təcrübəsi, idarəçilik bacarığı və dövlətçilik ənənələrinə sadiqliyi ilə Azərbaycanın qarşısında duran çətinlikləri aradan qaldıra biləcəyinə inanırdılar. Bu müraciət yalnız bir qrup insanın deyil, əslində, geniş xalq kütlələrinin də istəklərini və ümidlərini əks etdirirdi.

Müraciətdə, Ulu Öndər Heydər Əliyevin Naxçıvanda uğurlu fəaliyyətinin və onun ölkənin ümumi vəziyyətinin sabitləşdirilməsi üçün müstəsna rolu vurğulanırdı. İmzalanan sənəd Azərbaycanın müstəqilliyinin qorunması, ərazi bütövlüyünün təmin edilməsi və ölkənin inkişafı üçün bir çıxış yolu kimi Heydər Əliyevin ölkə rəhbərliyinə qayıdışının zəruriliyini ifadə edirdi.

1992-ci il noyabrın 21-də gənc respublikamızda çox əlamətdar hadisə baş vermişdir. Ulu Öndər Heydər Əliyevin rəhbərliyi ilə Naxçıvanda Yeni Azərbaycan Partiyasının təsis konfransı keçirilmişdir.

Ulu Öndər Heydər Əliyev xalqın çağırışına cavab olaraq siyasi arenaya qayıtdı və  1993-cü ildə Azərbaycan Prezidenti seçildi. Ümummilli Liderin rəhbərliyi ilə Azərbaycanın siyasi sabitliyi bərpa edildi, islahatlar həyata keçirildi və beynəlxalq əlaqələr möhkəmləndirildi. Bu, ölkənin iqtisadi və siyasi inkişafı üçün yeni bir səhifə açdı. Bu hadisə, eyni zamanda, Azərbaycanın gələcək siyasi xəttini müəyyən edən dönüş nöqtələrindən biri oldu. Heydər Əliyevin yenidən rəhbərliyə qayıdışı ölkədə milli birliyi möhkəmləndirdi, inkişaf və çiçəklənmə dövrünün əsasını qoydu.

YAP Azərbaycanda demokratik, hüquqi, dünyəvi dövlət və azad vətəndaş cəmiyyəti qurmaq məqsədi ilə irqindən, etnik mənsubiyyətindən, dinindən, dilindən, cinsindən, mənşəyindən, qulluq mövqeyindən, əqidəsindən asılı olmayaraq Azərbaycan vətəndaşlarını ümumi siyasi ideya və məqsəd ətrafında birləşdirən siyasi təşkilatdır.

Cənab İlham Əliyev, Ulu Öndər Heydər Əliyevin irsini davam etdirərək Yeni Azərbaycan Partiyasını daha da gücləndirmişdir. Prezident, Ali Baş Komandan İlham Əliyevin rəhbərliyi ilə Azərbaycan 2020-ci ilin Vətən müharibəsini Qələbə ilə başa çatdırmış, 30 illik işğala son qoyaraq ərazilərini azad etmişdir. Bu, YAP-ın Sədri cənab İlham Əliyevin ən böyük siyasi və tarixi uğurlarından biri hesab olunur.

YAP-ın xətti ilə dövlətin iqtisadiyyatını möhkəmləndirən, sosial islahatları dəstəkləyən və demokratiyanı inkişaf etdirən bir çox proqramlar həyata keçirilmişdir. Bu islahatlar nəticəsində Azərbaycanın iqtisadi inkişafı sürətlənmiş, müasir infrastruktur və sosial xidmətlər gücləndirilmişdir.

Cənab İlham Əliyev, Azərbaycanın xarici siyasətini, beynəlxalq əlaqələrini gücləndirərək regionda ölkəmizi mühüm bir dövlətə çevirmişdir. YAP-ın uğurlu fəaliyyəti, yalnız daxili siyasətdə deyil, həm də Azərbaycanın beynəlxalq aləmdəki mövqeyini gücləndirməyə və ölkənin sosial-iqtisadi inkişafını təmin etməyə xidmət etmişdir.

Prezident İlham Əliyev YAP-ın 5 mart 2021-ci il tarixli VII qurultayındakı çıxışında qeyd etmişdir: “Partiyamızın VII qurultayı ölkəmizin ictimai-siyasi həyatında önəmli hadisədir. Yeni Azərbaycan Partiyası nəinki Azərbaycanın, həm də Cənubi Qafqazın ən böyük siyasi partiyasıdır. Yeni Azərbaycan Partiyası bundan sonra da bütün ölkəmizdə gedən proseslərin mərkəzində olacaq”.

VII qurultayda Yeni Azərbaycan Partiyasının gələcək fəaliyyəti və inkişafı ilə bağlı əhəmiyyətli qərarlar qəbul olunmuşdur. Qurultayda Azərbaycan Respublikasının Birinci vitse-prezidenti Mehriban Əliyevanın YAP Sədrinin birinci müavini təyin edilməsi, partiyanın idarəetmə strukturunun gücləndirilməsinə və daha səmərəli fəaliyyət göstərməsinə səbəb oldu. Həmçinin, qurultayda qəbul edilmiş qərar əsasında Yeni Azərbaycan Partiyasının yeni Nizamnaməsi, 40 nəfər tərkibdə İdarə Heyəti, 13 nəfərdən ibarət Təftiş Komissiyası və yeni qurum olaraq YAP-ın Veteranlar Şurasının 35 nəfərlik tərkibi təsdiq edilmişdir. Butün bunlar Heydər Əliyev prinsiplərinə əsaslanaraq, Azərbaycanın qarşısında duran müasir siyasi, iqtisadi və sosial hədəfləri müəyyən edir​​.

Əminliklə söyləmək olar ki, Yeni Azərbaycan Partiyası yeni reallıqlar, həmçinin dövlətin qətiyyətli siyasəti, xalqın sarsılmaz həmrəyliyi fonunda öz üzərinə düşən vəzifələri layiqincə yerinə yetirməklə Azərbaycanın növbəti tarixi nailiyyətlər qazanmasına və yeni strateji zirvələr fəth etməsinə layiqli töhfəsini verəcəkdir.