Xəbərlər
Xaçmazda YAP-ın təsis edilməsinin 32-ci ildönümü qeyd olunub
Yeni Azərbaycan Partiyası (YAP) Xaçmaz rayon təşkilatı partiyanın təsis edilməsinin 32-ci ildönümü münasibətilə tədbir keçirib.
Tədbiri giriş sözü ilə açan YAP Xaçmaz rayon təşkilatının sədri Məhəmməd Balaqadaşov partiyanın yaranma tarixi və inkişaf dövrü barədə geniş məlumat verib. O qeyd edib ki, Ümummilli Lider Heydər Əliyevin rəhbərliyi ilə yaradılan Yeni Azərbaycan Partiyası ölkəmizin inkişafında mühüm rola malikdir: “Prezident, YAP-ın Sədri İlham Əliyevin rəhbərliyi ilə partiya nəinki ölkəmizin, hətta regionun aparıcı siyasi qüvvəsinə çevrilib. Hazırda dünyanın ən sabit və dinamik inkişaf edən dövlətləri ilə bir sırada yer alan Azərbaycanın qazandığı parlaq uğurlarda xalqımızın milli maraqlarını ifadə edən, vahid və avanqard siyasi qüvvəyə çevrilən YAP-ın mühüm rolu var”.
Tədbirdə çıxış edən YAP fəalları Nazim Ağayev, Nadir Süleymanov, Abasyar Heydərov, Sürəyya Əmirova, Sevinc Sədullayeva, İlham Musayev və başqaları Yeni Azərbaycan Partiyasının tarixi zərurətdən yarandığını, qısa müddətdə iqtidar partiyası olması və regionun ən möhtəşəm siyasi təşkilatına çevrildiyini qeyd ediblər.
Sonda uzun müddət YAP Xaçmaz rayon təşkilatının sədri olmuş Nazim Ağayevin 70 illik yubileyi, partiya fəalları Sevinc Sədullayeva, Məhəbbət Zeynalova, Rəşad Atakişiyev və Tükəzban Nəsirovanın doğum günləri ilə əlaqədar onlara Fəxri fərmanlar və qiymətli hədiyyələr təqdim edilib. Həmçinin, cari il ərzində rayonun ictimai-siyasi həyatında fərqlənən bir sıra partiya fəallarına hədiyyələr verilib.
