Xəbərlər
Azərbaycan davamlı uğurları ilə dünyanın diqqətindədir
Elmar Əhmədov
YAP Salyan rayon təşkilatının sədri
Qalib, bütövləşən, yeni Azərbaycan davamlı uğurları ilə dünyanın diqqətindədir. Möhkəm təmələ əsaslanan siyasət ölkəmizin qarşısında daim yeni imkanlar açır. Bu gün Azərbaycana hansı sahədən baxsaq dövrün tələblərinə uyğun olaraq təkmil islahatları və onun nəticəsi kimi dayanıqlı inkişafı görərik. Dövlət başçısı İlham Əliyev yeddinci çağırış Milli Məclisin ilk iclasında bir sıra mühüm məsələləri diqqətə çatdırıb.
Keçilən yolun təhlili təsdiqləyir ki, Azərbaycan nəinki 30 illik işğal, həmçinin 44 günlük İkinci Qarabağ müharibəsi və postmüharibə dövründə də müstəqil siyasəti ilə dünyanın diqqətindədir. Müharibənin dayandırılması ilə bağlı ölkəmizə çoxsaylı təzyiqlər göstərildi. Lakin Müzəffər Ali Baş Komandan İlham Əliyev mövqeyindən bir addım belə geri çəkilmədi. 44 günlük İkinci Qarabağ müharibəsində tarixi Zəfərimizin, Ermənistanın kapitulyasiyasının təsdiqi olan 10 noyabr 2020-ci il tarixli üçtərəfli Bəyanatın imzalanması bütün məqamlara aydınlıq gətirdi. Belə ki, bu sənədə uyğun olaraq Kəlbəcər, Ağdam, Laçın müharibəsiz geri qaytarıldı.
Prezident İlham Əliyev çıxışlarında bu məqama da diqqət yönəldir ki, 2020-ci ildə İkinci Qarabağ müharibəsi başa çatanda, Bayrağımız Şuşada və azad edilmiş digər ərazilərdə qaldırılanda hamımız işimizin yarımçıq qaldığını yaxşı bilirdik. Azərbaycan öz dövlət suverenliyini tam bərpa etməli idi və bunu etdi.
Tarixi Zəfərimizdən sonra Azərbaycan bu hədəfə sülh yolu ilə nail olmaq üçün səylər göstərdi. Ermənistan yenə də üzərinə düşən öhdəlikləri yerinə yetirməmək üçün müxtəlif yollara əl atdı, hərbi təxribatlar törətməklə vəziyyətin gərginləşməsində maraqlı olduğunu açıq-aydın nümayiş etdirdi. Bir günlük lokal antiterror tədbirlərini qaçılmaz edən səbəblər məlumdur. Ermənistanın mövqeyində təzadlı məqamlar artıq bir qayda kimi müşahidə olunur. Bir tərəfdən Azərbaycanın ərazi bütövlüyünü rəsmən tanıyan və bunu bəyan edən Ermənistan, digər tərəfdən bizə qarşı ərazi iddialarından əl çəkmirdi. Bunu, həm onların açıqlamaları, həm qanunları, həm də separatçı qüvvələrə Ermənistan rəhbərliyi tərəfindən göndərilən təbrik məktubları göstərirdi. Azərbaycan dövləti ərazi bütövlüyümüzün tam bərpa olunması istiqamətində məqsədyönlü şəkildə addımladı. Cənab İlham Əliyev bu məqamı da xüsusi vurğulayır ki, hər bir addımımızın məntiqi mənası var idi. Hər bir addım əvvəlki addımın məntiqi davamı idi.
Rəşadətli ordumuz ötən ilin 19 sentyabr tarixində bir günlük lokal antiterror tədbirlərini həyata keçirməklə suverenliyimizi tam təmin etdi. Müzəffər Ali Baş Komandan İlham Əliyev Azərbaycan Bayrağını Xankəndidə, Xocalıda, Ağdərədə, Xocavənddə ucaltdı, dövlətimizin başçısının iştirakı ilə Xankəndi şəhərində hərbi parad keçirildi. Bunlar Azərbaycan tarixinin möhtəşəm uğur səhifələridir. Azad Qarabağda və Şərqi Zəngəzurda genişmiqyaslı bərpa-quruculuq işləri həyata keçirilir. Soydaşlarımız mərhələ-mərhələ doğma yurd-yuvalarına qayıdırlar. Ermənilərin 30 il dağıtdığı ərazilər son dörd ildə cənnətə çevrilir. Müasir tələblər səviyyəsində qurulan, bərpa edilən torpaqlarımızda həyat canlanır.