Xəbərlər
Maksim Leskov: Səsvermə üçün zəruri olan bütün şərait yaradılıb, seçicilərin yüksək fəallığı müşahidə olunur
Biz beynəlxalq müşahidəçi qismində növbədənkənar parlament seçkilərində iştirak etməkdən çox məmnunuq. Tarixdə ilk dəfə Azərbaycanın bütün suveren ərazisində parlament seçkiləri keçirilir.
Bu sözləri Müstəqil Dövlətlər Birliyindən olan monitorinq missiyasının nümayəndəsi Maksim Leskov deyib.
“İnsanların sevinclə, bayram əhval-ruhiyyəsi ilə səsvermədə iştirak etdiklərini görməkdən çox məmnunuq. Başa düşürük ki, bir müddət əvvəl elə bu ərazidə müharibə gedirdi və indi belə demokratik prosedurda iştirak edən insanları görmək çox vacibdir. Biz İslam dünyasının mədəniyyət paytaxtı olan ən gözəl Şuşa şəhərinə gəldik. Bu gün səhər saatlarında seçki məntəqəsinin açılmasını izlədik, demək istəyirəm ki, çoxları artıq səsvermə hüququndan istifadə edib”, -deyə M.Leskov qeyd edib.
Səsvermə üçün bütün lazımi şəraitin yaradıldığını və yüksək seçici fəallığının olduğunu vurğulayan monitorinq missiyasının nümayəndəsi ümidvar olduğunu bildirib ki, onların missiyası seçkilərdə qanunun aliliyinin qorunması baxımından böyük əhəmiyyət kəsb etməklə yanaşı, həm də dostluğun möhkəmləndirilməsi kontekstində mühümdür.