Xəbərlər
YAP siyasəti dəstəklənir
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təşviqat mərhələsi çərçivəsində Yeni Azərbaycan Partiyası (YAP) tərəfindən 37 saylı Qaradağ seçki dairəsindən deputatlığa namizədliyi irəli sürülmüş Aydın Hüseynovun Qobustan qəsəbəsində seçicilərlə görüşü keçirilib.
Tədbiri giriş sözü ilə açan YAP Qaradağ rayon seçki qərargahının üzvü Cavanşir Əliyev bildirib ki, Prezident İlham Əliyevin rəhbərliyi ilə ümumxalq partiyasına çevrilən Yeni Azərbaycan Partiyası ölkəmizin siyasi-iqtisadi, ictimai və demokratik inkişafı istiqamətində dünənin, bu günün və sabahın partiyası kimi davamlı nailiyyətlərə imza atıb.
Tədbirdə çıxış edən deputatlığa namizəd Aydın Hüseynov partiyanın seçki platforması haqqında ətraflı məlumat verib. Bildirib ki, hərtərəfli inkişaf bütün sahələri əhatə etməklə yanaşı, ölkəmizin siyasi-iqtisadi və hərbi qüdrətinin, bütövlükdə milli gücünün artmasını təmin edib. Onun sözlərinə görə, Ümummilli Lider Heydər Əliyev tərəfindən əsası qoyulan və bu gün Prezident, Yeni Azərbaycan Partiyasının Sədri İlham Əliyev tərəfindən həyata keçirilən siyasət hər bir vətəndaş tərəfindən dəstəklənir.
Tədbirdə təşviqat qrupunun üzvləri Qobustan qəsəbəsinin Ağsaqqallar Şurasının sədri Allahverdi Məmmədov, el ağsaqqalı Hacı Qaraoğlan Həsənov, Zöhrab Babayev, İsmayıl Əlizadə, qəsəbə sakini Daşqın Əmralıyev, Vətən müharibəsi qazisi Bəhram Rəcəbli çıxış edərək YAP-ın siyasətinin ölkənin davamlı inkişafı üçün böyük əhəmiyyət daşıdığını və bu siyasətin davam etməsi üçün partiyanın namizədini seçicilərin dəstəkləməsinin vacib olduğunu deyiblər.
