Xəbərlər
Yeni zəfərlər bizi gözləyir
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təbliğat-təşviqat mərhələsi çərçivəsində Yeni Azərbaycan Partiyası (YAP) tərəfindən 75 saylı Yardımlı-Masallı seçki dairəsindən deputatlığa namizədliyi irəli sürülmüş Sərvər Əliyevin Yardımlı rayonunun Avaş kəndində seçicilərlə görüşü keçirilib.
Görüşü giriş sözü ilə açan YAP Yardımlı rayon təşkilatının məsləhətçisi Şaiq Zaidli qeyd edib ki, bu gün respublikada YAP-a alternativ olacaq qüvvə yoxdur. Onun sözlərinə görə, sentyabrın 1-də keçiriləcək seçkilər xalqın YAP-a etimadının növbəti ifadəsi olacaq.
Daha sonra o, deputatlığa namizəd Sərvər Əliyev haqqında seçicilərə məlumat verib.
Sərvər Əliyev YAP-ın seçki platformasında gələcək uğurlarımız naminə yeni hədəflərin əks olunduğunu deyib, seçiciləri parlament seçkilərində fəal iştirak etməyə səsləyib.
Tədbirdə, həmçinin təşviqat qrupunun üzvü Rafiq Əliyev və digərləri çıxış edərək yarandığı vaxtdan iştirak etdiyi bütün seçkilərdə qələbələr qazanan YAP-ın daim xalqın mənafeyindən çıxış etdiyini və bu gün siyasi sistemin aparıcı qüvvəsi kimi ölkəmizə mühüm nailiyyətlər qazandırdığını vurğulayıb. Seçicilərə parlament seçkilərində YAP-ın namizədinə səs verməyə çağırış edilib.
Qeyd edək ki, həmin gün deputatlığa namizəd Avaş kəndində şəhid məzarlarını ziyarət edib.
