Xəbərlər
Yeni hədəflərə doğru irəliləmək zamanıdır
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərdə Yeni Azərbaycan Partiyası (YAP) tərəfindən 86 saylı Ağcabədi seçki dairəsindən deputatlığa namizədliyi irəli sürülmüş Tahir Rzayevin Ağcabədi rayon seçiciləri ilə fərdi görüşləri keçirilib.
Deputatlığa namizəd Tahir Rzayev Ağcabədi şəhər seçicisi, 92 yaşlı YAP veteranı Sərxan Səfərovun evində olub, onunla söhbət aparıb. Söhbət zamanı 40-50 il əvvəl rayonun ictimai-siyasi həyatında onların birgə fəaliyyətləri, keçmiş xatirələr yada salınıb, ölkədə və xaricdə baş verən proseslər müzakirə edilib.
S.Səfərov onu ziyarət etdiyi üçün Tahir Rzayevə öz təşəkkürünü bildirib.
Tahir Rzayev həmçinin, Ağcabədi şəhərində 44 günlük Vətən müharibəsi şəhidi Məhəmməd Məmmədovun abidəsi önünə gül dəstələri düzüb, sonra şəhidin evində olub, valideynləri ilə çay süfrəsi arxasında söhbət edib. Söhbət zamanı Tahir Rzayev Ali Baş Komandan İlham Əliyevin rəhbərliyi ilə hərbiçilərimizin qəhrəmanlığı sayəsində 30 il işğal altında qalan torpaqlarımızın azad edilməsində xüsusi xidmətləri olan şəhidlərə Allahdan rəhmət diləyib.
Öz növbəsində şəhid atası Abbas Məmmədov dövlətimizin onlara göstərdiyi qayğıdan razı qaldıqlarını və Prezident İlham Əliyevə öz minnətdarlığını bildirib.
