Xəbərlər
Milli Qurtuluş Gününə həsr edilmiş intellektual yarış keçirilib
Beyləqan rayonu ərazisində 146 ailəlik Xocavənd qəsəbəsində yerləşən Qaradağlı kənd tam orta məktəbində 15 İyun - Milli Qurtuluş Gününə həsr edilmiş intellektual yarış keçirilib.
Yarış YAP Xocavənd rayon təşkilatı, Xocavənd Rayon İcra Hakimiyyəti və Qarabağ Regional Təhsil idarəsinin Xocavənd sektorunun birgə təşkilatçılığı ilə baş tutub.
Əvvəlcə Dövlət Himni səsləndirilib, Ulu Öndər Heydər Əliyevin və torpaqlarımızın azadlığı uğrunda canından keçmiş şəhidlərimizin əziz xatirəsi bir dəqiqəlik sükutla yad edilib.
Tədbirdə çıxış edən YAP Xocavənd rayon təşkilatının sədri Vüsal Hüseynov və digərləri bildiriblər ki, bəzi tarixi günlər xalqın gələcəyini müəyyən edən böyük başlanğıcların əsasını qoyur. Tariximizə Milli Qurtuluş Günü kimi daxil olan 1993-cü ilin 15 iyun tarixi belə əhəmiyyətli günlərdəndir. Milli Qurtuluş Günü böyük ictimai, siyasi və tarixi əhəmiyyətə malik gündür. Vətənini, xalqını sevənlər, çətin günlərin ağrılarını, dəhşətlərini yaşayanlar, hadisələri görənlər üçün 15 iyun əsl Qurtuluş Günü, Azərbaycan dövlətçiliyinin ölüm-dirim mübarizəsinin tarixidir.
Ümumtəhsil müəssisələrinin yuxarı sinif şagirdləri arasında təşkil olunmuş yarışda hər birində 6 nəfər olmaqla, ümumilikdə, 6 komanda iştirak edib.
Nəticələrə əsasən birinci yerə Salakətin kənd tam orta məktəbin “Xarı bülbül” komandası, ikinci yerə Salakətin kənd tam orta məktəbin “İstiqlal” komandası, üçüncü yerə isə Qaradağlı kənd tam orta məktəbin “Bayraq” komandası layiq görülüblər.
Qalib komandalar diplom və medallarla təltif edilib.
