Xəbərlər
Azərbaycanı Zəfərlərə doğru aparan Lider!
2024-cü il fevralın 7-də ölkəmizdə keçiriləcək prezident seçkiləri ilə əlaqədar Yeni Azərbaycan Partiyası tərəfindən namizədliyi irəli sürülmüş İlham Heydər oğlu Əliyevin seçkiqabağı təşviqat kampaniyası çərçivəsində yanvarın 27-də Ağdam Muğam Mərkəzində seçicilərlə görüş keçirilib.
Əvvəlcə Azərbaycanın Dövlət Himni səsləndirilib, Ümummilli Lider Heydər Əliyevin və şəhidlərin əziz xatirəsi bir dəqiqəlik sükutla yad edilib. Sonra Prezident İlham Əliyevin fəaliyyətini əks etdirən videoçarx nümayiş olunub.
Görüşdə YAP Ağdam rayon təşkilatının sədri Mansur Quliyev, Milli Məclisin deputatı Bəxtiyar Sadıqov, təşviqat qrupunun üzvləri Mətanət Misirxanova, Xalidə Həsənova, Natiq Cavadov, Səyyarə Məmmədova, Bəhram Qurbanov, Məhəmməd Hüseynov, Ramil Səlimov və qazi Baxşeyiş Hətəmov çıxış ediblər.
Çıxışlar zamanı Prezident İlham Əliyevin uğurlu siyasəti sayəsində Azərbaycanın bütün bölgələrinin yüksək səviyyədə inkişaf etdiyi vurğulanıb. Həmçinin qeyd olunub ki, bu gün işğaldan azad olunmuş ərazilərimizdə aparılan tikinti, quruculuq işləri uğurla davam etdirilməkdədir və Böyük Qayıdış Dövlət Proqramı çərçivəsində keçmiş məcburi köçkünlərimizin öz evlərinə qayıtması Prezident İlham Əliyevin dəmir iradəsinin və uzaqgörən siyasətinin məntiqi nəticəsidir.
Görüş zamanı çıxış edən seçicilər fevralın 7-də seçki məntəqələrinə gedərək uğurlu gələcəyimizin təminatçısı cənab İlham Əliyevə səs verəcəklərini bildiriblər.
Görüş Yeni Azərbaycan Partiyası Himninin sədaları altında başa çatıb.
