Xəbərlər
Xudayar Həsənli: Bakı Beynəlxalq Dəniz Ticarət Limanı Azəbaycanın qeyri-neft sektorunda ən böyük paya malik olacaq

"Logistic Hub" Azərbaycanın qeyri-neft iqtisadiyyatının inkişafında ən önəmli layihələrdən biridir.
Bunu Trend-ə açıqlamasında Bakı Beynəlxalq Dəniz Ticarət Limanının departament rəisi Xudayar Həsənli deyib.
X.Həsənli Azərbaycanda qeyri-neft sektorunun inkişaf etdiyini, bu sahədə həyata keçirilən ən iri layihələrdən birinin “Logistic Hub” olduğunu bildirib:
"Logistic Hub" deyəndə burada təkcə liman yox, kompleks şəkildə həm də azad zona, dəmir yolu, gəmiçilik, yükdaşma və tranzit nəzərdə tutulur. Bakı Beynəlxalq Dəniz Ticarət Limanı isə bunların düz mərkəzində yer tutur. Bu, Azərbaycanda qeyri-neft sektoruna birbaşa xidmətdir".
Xatırladaq ki, 14 may 2018-ci il tarixində Azərbaycan Prezidenti İlham Əliyevin iştirakı ilə açılışı həyata keçirilmiş yeni Bakı Limanının 1-ci fazada yükaşırma potensialı 15 milyon ton, o cümlədən 100 000 TEU konteynerdir. Qaradağ rayonunun Ələt qəsəbəsində yerləşən və 12 körpüdən ibarət limanın 7 körpüsü ümumi quru yük gəmilərinə, 2 körpü bərələrə, 2 körpü isə "Ro-Ro" və "Ro-Pax" tipli gəmilərə xidmət göstərir. Daha bir körpü isə Liman donanmasına xidmət edən körpü kimi istifadə olunur.