Xəbərlər
Səbail seçiciləri sabitliyə və inkişafa səs verəcəklər
Yeni Azərbaycan Partiyasının prezidentliyə namizədi cənab İlham Əliyevin təbliğat-təşviqat kampaniyası çərçivəsində YAP Mərkəzi Seçki Qərargahının Səbail rayon şöbəsi seçicilərlə “İLHAMLA İRƏLİ!” şüarı ilə növbəti görüşünü keçirib.
Görüşü giriş sözü ilə açan Milli Məclisin deputatı, YAP Səbail rayon təşkilatının sədri Şəmsəddin Hacıyev Azərbaycanın son 15 ildə əldə etdiyi uğurlardan, həyata keçirilən islahatlardan, ölkəmizin qüdrətinin daha da artmasından bəhs edib. Millət vəkili Səbail rayon seçicilərini 11 aprel prezident seçkilərində fəal olmağa, Prezidentimizə inam və etimadlarını səsləri ilə bir daha təsdiqləməyə çağırıb.
Görüşdə çıxış edən Milli Məclisin Aqrar siyasət komitəsinin sədri Eldar İbrahimov Ulu öndər Heydər Əliyevin təməlini qoyduğu uğurlu siyasətin son 15 ildə Prezident İlham Əliyev tərəfindən eyni ardıcıllıqla davam etdirilməsinin ölkəmizin hərtərəfli və uzunmüddətli inkişafına möhkəm əsaslar formalaşdırdığını diqqətə çatdırıb. “Partiyamızın namizədi cənab İlham Əliyevin titanik fəaliyyəti Azərbaycanı nümunəvi inkişaf modelinə malik güclü dövlətə çevirib. Bu gün hər bir Azərbaycan vətəndaşı öz ölkəsi və Prezidenti ilə qürur duyur. Hesab edirəm ki, bu amil aprelin 11-də insanların doğru seçim etmələri üçün əsas olacaq”, - deyə E.İbrahimov bildirib.
Millət vəkili Səbail rayonunun seçicilərini Heydər Əliyev siyasətinin davamı naminə 11 aprel seçkilərində cənab İlham Əliyevə səs verməyə çağırıb.
Görüşdə həmçinin, Azərbaycan Memarlıq və İnşaat Universitetinin rektoru Gülçöhrə Məmmədova, “İki sahil” qəzetinin baş redaktoru Vüqar Rəhimzadə, “Səs” qəzetinin baş redaktoru Bəhruz Quliyev və digərləri çıxış edərək seçicilərə YAP-ın namizədi cənab İlham Əliyevin seçki proqramı haqqında ətraflı məlumat verib, ölkəmizdə bütün sosial-iqtisadi sahələr üzrə əldə olunmuş möhtəşəm və misilsiz uğurlar haqqında danışıblar.
