Xəbərlər
Azərbaycan-Serbiya: nümunəvi dostluq və etibarlı strateji tərəfdaşlıq
Nurlan Həsənov
Milli Məclisin deputatı
Fevralın 15-də Prezident İlham Əliyevin Serbiya Respublikasına rəsmi səfəri iki ölkə arasında uzun illərə söykənən dostluq və etimad münasibətlərinin yeni mərhələyə keçdiyini bir daha təsdiqləir. Bu səfər, həmçinin regionda və Avropa məkanında strateji əməkdaşlığın nümunəsi kimi dəyərləndirilir.
Uzunmüddətli etimad və səmimi dialoq iki ölkənin strateji tərəfdaşlığının əsas məqsədlərindən biridir. Liderlərin qarşılıqlı hörmət və dostluq münasibətləri ikitərəfli əməkdaşlığın möhkəmlənməsinə böyük töhfə verir. Bu münasibətlər həm də beynəlxalq platformalarda bir-birinin suverenliyini dəstəkləmək və regionda stabilliyi təmin etmək baxımından əhəmiyyət daşıyır.
Səfər çərçivəsində keçirilən Azərbaycan və Serbiya arasında Strateji Tərəfdaşlıq Şurasının 1-ci iclası əməkdaşlığın strukturlaşmış xarakterini daha da gücləndirir. Şuranın gündəliyində siyasi dialoqdan iqtisadi əməkdaşlığa, energetikadan nəqliyyat layihələrinə qədər geniş sahələr müzakirə olunub. Bu faktor tərəflərin öhdəliklərini aydın şəkildə müəyyən edir və icranın nəzarət mexanizmini təmin edir. Nəticədə strateji tərəfdaşlıq konkret layihələr və nəticələrlə özünü göstərir.
Energetika sahəsi Azərbaycan üçün strateji əhəmiyyət daşıyan sahələrdən biridir. Səfər çərçivəsində Serbiyaya təbii qaz ixracının başlanması və ixrac həcminin artırılması məsələsi müzakirə olunub. Bu təşəbbüslər iki ölkə arasında enerji təhlükəsizliyinin möhkəmləndirilməsinə xidmət edir, eyni zamanda gələcəkdə ixrac imkanlarını genişləndirir. Energetik əməkdaşlıq yalnız iqtisadi baxımdan deyil, həm də geosiyasi əhəmiyyətə malikdir, çünki Avropa məkanında enerji təhlükəsizliyinə töhfə verir. Bundan əlavə, Serbiyada birgə elektrik stansiyasının inşası layihəsi strateji əməkdaşlığın mühüm göstəricisidir. Layihə Serbiyanın daxili enerji istehsal potensialını artırmaqla yanaşı, enerji təhlükəsizliyinin möhkəmləndirilməsinə xidmət edəcək. Azərbaycanın bu layihəyə böyük həcmdə sərmayə qoymağa hazır olması Serbiya iqtisadiyyatına verdiyi strateji dəstəyi nümayiş etdirir. Layihənin texniki-iqtisadi qiymətləndirməsi və icrası zamanı hər iki ölkənin mütəxəssisləri birgə çalışacaq, nəticədə Avropaya enerji ixracı üçün yeni imkanlar açılacaq. Dövlətimizin başçısı mətbuata bəyanatında qeyd edib ki, biz 2032-ci ilə qədər əlavə 8 giqavat enerji gücünü əldə edəcəyik və bunun böyük hissəsi ixraca gedəcək: “Bunun üçün bizim yeni və daha genişhəcmli transmissiya imkanlarımız olmalıdır. Çünki bizim əsas ixrac istiqamətimiz Avropa məkanıdır”.
İqtisadi və investisiya sahəsində əməkdaşlıq da xüsusi əhəmiyyət kəsb edir. Serbiyanın təbii resurslara malik olmamasına baxmayaraq, aparılan iqtisadi islahatlar və güclü idarəetmə nəticəsində ölkə xarici sərmayələr üçün cəlbedici mühitə çevrilib. Azərbaycanın Serbiyaya sərmayə yatırmaq niyyəti strateji tərəfdaşlığın iqtisadi göstəricisi kimi xüsusi əhəmiyyət daşıyır. Bu sərmayələr enerji, nəqliyyat və sənaye sahələrində həyata keçiriləcək, nəticədə iki ölkənin iqtisadi əlaqələri yeni mərhələyə keçəcək.
Yüksək səviyyəli qarşılıqlı səfərlər əməkdaşlığın davamlılığını təmin edir. Prezident İlham Əliyevin dəvəti ilə Serbiya nümayəndə heyətinin Azərbaycana səfəri və gələcəkdə bir neçə görüşün planlaşdırılması strateji dialoqun dayanıqlığını nümayiş etdirir. Bu kimi amillər həm də iki ölkənin uzunmüddətli perspektivlər üçün birgə planlar qurduğunu göstərir və regionda sabitliyin qorunmasına töhfə verir.
Gələcəkdə Azərbaycan və Serbiya arasında əməkdaşlıq yeni layihələrlə genişlənəcəkdir. Hər iki ölkə qarşılıqlı investisiyaların artırılması, eləcə də innovativ enerji həllərinin tətbiqi istiqamətində yeni təşəbbüslər üzərində işləyir. Bu addımlar iki tərəf arasında iqtisadi inteqrasiyanı dərinləşdirir və regionda sabit və dayanıqlı inkişafın təminatına xidmət edir. Belə strateji yanaşma, həmçinin Avropada enerji və nəqliyyat şəbəkələrinin daha səmərəli işləməsinə töhfə verəcək.
Eyni zamanda, siyasi və diplomatik sahədə də əməkdaşlıq davamlı şəkildə möhkəmləndirilir. İkitərəfli dialoqların və yüksək səviyyəli səfərlərin davamlılığı iki ölkənin beynəlxalq platformalarda bir-birinə dəstəyini göstərir və regionda etimad mühitini artırır. Prezident İlham Əliyevin səfəri və həyata keçirilən layihələr Azərbaycanın Serbiya ilə strateji tərəfdaşlıq prinsiplərinə sadiqliyini nümayiş etdirir, bu isə gələcəkdə qarşılıqlı faydalı təşəbbüslərin genişlənməsi üçün möhkəm zəmin yaradır.