Xəbərlər
Qarşılıqlı əməkdaşlığın genişləndirilməsi əsas hədəflərdəndir
“Dövlət başçısı İlham Əliyev Ümumdünya İqtisadi Forumunun illik toplantısında iştirak etmək üçün İsveçrə Konfederasiyasında səfərdədir. Bu il 56-cı iclasını keçirən Forum çərçivəsində qlobal iqtisadi gündəliyin aktual məsələləri üzrə geniş müzakirələr aparılır, müxtəlif mövzular ətrafında panel sessiyaları keçirilir, beynəlxalq ictimaiyyətə mühüm çağırışlar ünvanlanır. Yanvarın 19-dan 23-dək davam edəcək 56-cı Dünya İqtisadi Forumu “Dialoq ruhu - qlobal mürəkkəblik və bölünmə şəraitində fikir mübadiləsi və anlaşma daha vacibdir” devizi altında dünya liderlərini, dünyanın aparıcı iş adamlarını bir araya gətirib. Forumda 130-dan artıq ölkədən 3000 nümayəndə iştirak edir. Tədbirə 65 dövlət və hökumət başçısı daxil olmaqla 400 siyasi lider, 850-dən çox iri şirkət rəhbəri, eləcə də qabaqcıl texnologiya sahəsində fəaliyyət göstərən nüfuzlu liderlər qatılıb. İştirakçıların say tərkibi Forumun qlobal miqyasda dialoq və əməkdaşlıq üçün mühüm platforma olduğunu, müzakirəyə çıxardığı mövzunun aktuallığını bir daha təsdiqləyir. Azərbaycan Davos Forumunda ilk dəfə 1995-ci ildə iştirak edib və həmin dövrdən bu ənənə davam etdirilir. 2007-ci ildən etibarən Prezident İlham Əliyevin bu tədbirlərdə mütəmadi iştirakı Azərbaycanın mövqeyini daha da möhkəmləndirir, ölkəmizin sosial-iqtisadi, siyasi, enerji, nəqliyyat və digər sahələrdə əldə etdiyi uğurları dünyaya təqdim edir. Ənənəvi keçirilən Forumun gündəliyi, əhatə etdiyi mövzu, panel iclasda müzakirəyə çıxarılan məsələlər hər bir dövrün çağırışlarını özündə ehtiva edir. Dövlət başçısı İlham Əliyevin Forum çərçivəsində keçirdiyi çoxsaylı görüşlər, müsahibəsi, çıxışı ölkəmizin beynəlxalq təqdimatında əhəmiyyətli rol oynayır. Bu görüşlərdə Azərbaycanın malik olduğu iqtisadi imkanlara diqqət yönəldilərək əməkdaşlığın yeni prioritetləri müəyyənləşdirilir”. Bu fikirləri Milli Məclisin deputatı Malik Həsənov bildirib.
Millət vəkili qeyd edib ki, dövlət başçısı İlham Əliyevin keçirdiyi görüşlərin say tərkibinə diqqət yetirdikdə Azərbaycanın beynəlxalq nüfuzu, Prezidentimizə böyük etimad özünün aydın ifadəsini tapır: “Belə ki, Braziliyanın aparıcı investisiya banklarından və aktivlərin idarə edilməsi şirkətlərindən biri olan “BTG Pactual” şirkətinin sədri Andre Esteves, “Vestas Wind Systems” şirkətinin marketinq, kommunikasiya, davamlılıq və ictimaiyyətlə əlaqələr üzrə qrupunun baş vitse-prezidenti Morten Dirholm, dünyanın ən böyük liman operatorlarından biri olan “DP World” şirkətlər qrupunun sədri və icraçı direktoru Sultan Əhməd bin Sulaim, Ümumdünya Səhiyyə Təşkilatının Baş direktoru Tedros Adhanom Qebreyesus, “Carlsberg Group” şirkətinin Baş icraçı direktoru Yakob Aarup-Andersen, İraq Kürdüstan Regionunun Baş naziri Məsrur Bərzani, Finlandiya Respublikasının Prezidenti Aleksandr Stubb, dünyanın aparıcı qlobal maliyyə institutlarından biri olan Amerika Birləşmiş Ştatlarının “J.P. Morgan” şirkətinin sədri və baş icraçı direktoru Ceymi Daymon, Çex Respublikasının Baş naziri Andrey Babiş və digər ölkələrin, aparıcı şirkətlərin rəhbərləri ilə görüşən Prezident İlham Əliyev bununla Azərbaycanın əməkdaşlıqda, dövlətlərarası münasibətlərdə əsas amillərdən olan qarşılıqlı etimad mühitinin qorunmasında nə qədər maraqlı olduğunu nümayiş etdirir. Cənab İlham Əliyevin çağırışlarında daim bu məqam xüsusi qeyd edilir ki, Azərbaycan yalnız sülh, əməkdaşlıq gündəliyini təqdim etmir, buna nail olmaq üçün davamlı, qətiyyətli, konkret addımlar atır. Bu gün tarixi Zəfərimizin yaratdığı reallıqlar fonunda Azərbaycanın regionda dayanıqlı sülhün təmin edilməsi istiqamətində atdığı real addımlara və nəticələrə diqqət yetirmək kifayətdir”.
Malik Həsənov dövlət başçısı İlham Əliyevin Forum çərçivəsində “Euronews” televiziyasına müsahibəsində səsləndirdiyi çağırışlara da diqqəti yönəldib: “Dövlət başçısı İlham Əliyev “Zayed İnsan Qardaşlığı Mükafatı”na layiq görülməsini otuz ildən artıq müddətdə qan tökülməsindən, münaqişə və müharibələrdən sonra Qafqazda sülhün qurulmasında səylərimizə verilən qiymət kimi qəbul etdi. Ölkə Prezidenti bu çağırışı etdi ki, bu gün Cənubi Qafqaz yeni inkişaf mərhələsinə daxil olur. Biz beş-altı aydır sülh şəraitində yaşayırıq. Buna öyrəşirik. Öz müstəqillik tariximizdə heç zaman sülh şəraitində yaşamamışıq. Xüsusi hissdir və əlbəttə ki, böyük fürsətdir. Bu gün Azərbaycan ilə Ermənistan arasında münasibətlər artıq əməkdaşlığa çevrilir. Biz Ermənistana gedən yüklərin daşınmasında bütün məhdudiyyətləri aradan qaldırdıq. Bundan əlavə, Ermənistanın böyük dərəcədə asılı olduğu əsas malların, ilk növbədə neft məhsullarının həmin ölkəyə təchizatına başlamışıq. Bu vəziyyətdən hamı udur. Ermənistan və Azərbaycanın, eləcə də vətəndaş cəmiyyətinin birgə səyləri ilə Qafqazda uzunmüddətli deyil, əbədi sülhə nail olacağıq. Məqsədimiz budur”.
Millət vəkili, həmçinin müsahibədə diqqət yönəldilən məsələlər sırasında Azərbaycanın malik olduğu enerji ehtiyatlarından, onların ölkələr arasında əməkdaşlıq əlaqlərinin möhkəmləndirilıməsində əsas amillərdən biri olmasından bəhs edib: “Azərbaycanın iştirakçısı və təşəbbüsçüsü olduğu enerji layihələri dünyanın enerji xəritəsini yenidən tərtib edir. Ölkəmizin enerji sektorunda qazandığı uğurlar etibarlı tərəfdaş kimi mövqeyini daha da möhkəmləndirir. Əməkdaşlığın coğrafiyasının genişlənməsi də bunun bariz nümunəsidir. Dövlət başçısı İlham Əliyevin müsahibəsində vurğuladığı kimi, Avropa və Avropa İttifaqı ilə enerji əməkdaşlığımız artmaqdadır. Artıq 16 ölkəyə təbii qaz ixrac edirik və onların 10-u Avropa İttifaqının üzvüdür. Boru kəməri qazı ilə coğrafi əhatəsinə görə Azərbaycan dünyada birinci yerdədir. Azərbaycan təbii resurslara, nəqliyyat sisteminə və müasir boru kəmərlərinə malikdir. Bir çox Avropa ölkəsi ilə yaxşı münasibətlərimiz var və bu, onlar üçün öz enerji təhlükəsizliyini gücləndirmək imkanıdır. Azərbaycan üçün isə bu, premium bazarda ehtiyatlarımızı satmaq fürsətidir”.
Malik Həsənov bildirib ki, Prezident İlham Əliyev Davos Ümumdünya İqtisadi Forumunun illik toplantısı çərçivəsində “Avrasiyanın iqtisadi özünəməxsusluğunun müəyyənləşdirilməsi” mövzusunda panel iclasda da çıxış etdi: “Dövlətimizin başçısı çıxışında gələcəyi necə gördüyünü ətraflı şəkildə diqqətə çatdırdı. Bu məqam xüsusi vurğulandı ki, üç onillikdən artıq çəkən müharibəyə və qan tökməyə son qoymaqla tarixi nailiyyət əldə olundu. Sülh sazişinin nadirliyi ondan ibarətdir ki, o, son qanlı toqquşmadan sonra iki ildən az müddətdə paraflandı. Bu göstərir ki, əgər hər iki tərəfin güclü siyasi iradəsi, sülhə sadiqliyi olarsa, onda kifayət qədər qısa müddət ərzində barışıq əldə edə bilərsiniz”.
Millət vəkili qeyd edib ki, təhlillərdən də göründüyü kimi, Forumun əsas hədəfi qlobal iqtisadi və geosiyasi problemlərin həlli yollarının müzakirəsi, qarşılıqlı əməkdaşlığın genişləndirilməsi, dövrün çağırışlarının uğurla həyata keçirilməsidir.