Xəbərlər
“Müstəqil, suveren Azərbaycanın uğurları milli birliyin, milli həmrəyliyin təntənəsidir!”
Yeni Azərbaycan Partiyası (YAP) Qazax rayon təşkilatı, Qazax Rayon İcra Hakimiyyəti və Milli Məclisin Beynəlxalq Münasibətlər və Parlamentlərarası əlaqələr komitəsinin birgə təşkilatçılığı ilə “Müstəqil, suveren Azərbaycanın uğurları milli birliyin, milli həmrəyliyin təntənəsidir!” mövzusunda 31 dekabr - Dünya Azərbaycanlılarının Həmrəyliyi Gününə həsr olunmuş tədbir keçirilib.
Əvvəlcə tədbir iştirakçıları Ümummilli Lider Heydər Əliyevin büstünün önünə gül dəstələri düzüblər.
Tədbirdə öncə Ümummilli Lider Heydər Əliyevin, ölkəmizin ərazi bütövlüyü və suverenliyi uğrunda canlarından keçmiş şəhidlərin əziz xatirəsini bir dəqiqəlik sükutla yad ediblər. Sonra Azərbaycan Respublikasının Dövlət Himni səsləndirilib.
Tədbirdə YAP Qazax rayon təşkilatının sədri Anar Nəbiyev, Qazax Rayon İcra Hakimiyyətinin başçısı Rəcəb Babaşov, Milli Məclisin Beynəlxalq Münasibətlər və Parlamentlərarası əlaqələr komitəsinin sədri, YAP Təftiş Komissiyasının üzvü Səməd Seyidov, şəhid atası Müqabil Məmmədov, partiya fəallarından Esmira Şıxməmmədova, Aynurə Abbasova, partiya veteranları şair Cavanşir Rüstəm və Kazım Kazımlı çıxış ediblər.
Çıxışlarda 2025-ci il “Konstitusiya və Suverenlik İli”nin respublikamız üçün çox uğurlu, əlamətdar, nailiyyətlərlə zəngin bir il olduğu qeyd olunub. Natiqlər Ümummilli Lider Heydər Əliyevin ölkəmizin inkişafı naminə göstərdiyi müstəsna xidmətlərdən, 31 dekabr - Dünya Azərbaycanlılarının Həmrəyliyi Gününün əhəmiyyətindən danışıblar. Onlar müstəqil, suveren Azərbaycanın uğurlarının təməlində məhz milli birlik və həmrəyliyin dayandığını xüsusi vurğulayıblar.
Diqqətə çatdırılıb ki, Konstitusiya dəyərlərinə sadiqlik və suverenliyin möhkəmləndirilməsi dövlət siyasətinin əsas prioritetlərindəndir. Milli həmrəyliyin qorunması cəmiyyətin dayanıqlı inkişafı və ictimai sabitliyin təmin olunmasında həlledici rol oynayır. Bu dəyərlər ətrafında formalaşan ümumxalq həmrəyliyi gələcək hədəflərin reallaşdırılması üçün möhkəm zəmin yaradır.
Tədbirin sonunda rayonun ictimai-siyasi həyatında fəal iştirak edən bir qrup şəxsə YAP Qazax rayon təşkilatı tərəfindən fəxri fərman və hədiyyələr təltif olunub. Həmçinin, YAP sıralarına yeni qəbul olunmuş gənclərə partiya vəsiqələri təqdim edilib.
Tədbirə Yeni Azərbaycan Partiyasının Himninin səsləndirilməsi ilə yekun vurulub.
