Xəbərlər
YAP-ın 33 illiyi Qubada da qeyd olunub
“Konistitusiya və Suverenlik ili” çərçivəsində Yeni Azərbaycan Partiyasının (YAP) yaradılmasının 33-cü ildönümü ilə əlaqədar “Prezident İlham Əliyevin rəhbərliyi ilə Yeni Azərbaycan Partiyası daha möhtəşəm zəfərlər qazanacaq” mövzusunda tədbir keçirilib.
Tədbirdə YAP Quba rayon təşkilatının sədri Fidan Hüseynova, Quba Rayon İcra Hakimiyyətinin başçısı İlqar Mahmudov, şəhid ailələri, partiya veteranları, ərazi partiya təşkilat sədrləri və partiya fəalları iştirak edib.
Tədbir iştirakçıları öncə Ulu Öndər Heydər Əliyevin abidəsini ziyarət edib, Ümummilli Liderin əziz xatirəsini dərin hörmət və ehtiramla anıblar.
Tədbirdə əvvəlcə Ulu Öndər Heydər Əliyevin, Azərbaycanın ərazi bütövlüyü və suverenliyi uğrunda canlarını qurban vermiş şəhidlərin əziz xatirəsi bir dəqiqəlik sükutla yad edilib. Sonra Azərbaycan Respublikasının Dövlət Himni səsləndirilib.
Çıxış edənlər natiqlər Yeni Azərbaycan Partiyasının 33 il ərzində ölkəmizin ictimai-siyasi həyatında mühüm rolu, dövlətçilik dəyərlərinin qorunmasında əhəmiyyətini vurğulayıblar. Bildirilib ki, Ümummilli Lider Heydər Əliyevin ideyaları əsasında formalaşan YAP ötən illər ərzində Azərbaycanın sabitlik, inkişaf və birlik modelinin əsas siyasi dayağına çevrilib.
Natiqlər vurğulayıblar ki, Prezident, YAP-ın Sədri İlham Əliyevin rəhbərliyi ilə həyata keçirilən məqsədyönlü siyasət nəticəsində ölkəmizin regional və qlobal miqyasda mövqeləri daha da güclənib, sosial-iqtisadi yüksəliş və milli həmrəyliyin təmin olunması istiqamətində mühüm nailiyyətlər əldə edilib. Qeyd olunub ki, 33 illik zəngin inkişaf yolu YAP-ın milli maraqları hər zaman ön planda tutan, cəmiyyətin bütün təbəqələrini birləşdirən aparıcı siyasi qüvvə olduğunu bir daha sübut edir.
Tədbir iştirakçıları, həmçinin Azərbaycanın ərazi bütövlüyünün və suverenliyinin bərpa olunmasının dövlətçilik tariximizdə dönüş nöqtəsi olduğunu, bu tarixi qələbənin əldə edilməsində YAP-ın sistemli siyasi xəttinin mühüm rol oynadığını diqqətə çatdırıblar. Qeyd olunub ki, partiyanın əsas məqsədi ölkəmizin dayanıqlı inkişafını, güclü dövlət və rifah cəmiyyətinin qurulmasını təmin edən strateji hədəflərə xidmət etməkdir.
Ardınca YAP sıralarına yeni qəbul olunan üzvlərə partiya vəsiqələri təqdim edilib.
Daha sonra Yeni Azərbaycan Partiyasının 33 illik fəaliyyətinə həsr olunmuş videoçarx nümayiş etdirilib.
Tədbirin rəsmi hissəsinə Yeni Azərbaycan Partiyasının Himninin səsləndirilməsi ilə yekun vurulub.
Sonra tədbir bədii hissə ilə davam edib.
