Xəbərlər
“Yeni Azərbaycan Partiyasının 33 illik tarixi missiyası”
Naftalanda Yeni Azərbaycan Partiyasının təsis edilməsinin 33-cü ildönümünə həsr olunmuş “Yeni Azərbaycan Partiyasının 33 illik tarixi missiyası” mövzusunda tədbir keçirilib.
Tədbirdə Naftalan Şəhər İcra Hakimiyyəti başçısı səlahiyyətlərini müvəqqəti icra edən, ŞİH başçısının müavini Arzu Məmmədov, YAP Naftalan şəhər təşkilatının sədri Rövlan Heydərov, YAP Mərkəzi Aparatının məsul işçisi Araz Salmanov, ərazi partiya təşkilat sədrləri, ziyalılar, partiya veteranları və gənclər iştirak ediblər.
Əvvəlcə Ümummilli Lider Heydər Əliyevin abidəsi ziyarət edilib, abidə önünə gül dəstələri düzülüb.
Tədbir Azərbaycan Respublikasının Dövlət Himninin səsləndirilməsi ilə başlayıb. Ulu Öndər Heydər Əliyevin və Azərbaycanın müstəqilliyi uğrunda canlarından keçən şəhidlərimizin xatirəsi bir dəqiqəlik sükutla yad edilib.
Sonra YAP-ın 33 illik fəaliyyətindən bəhs edən videoçarx nümayiş olunub.
Çıxışlarda bildirilib ki, müasir müstəqil Azərbaycan dövlətinin qurulması və möhkəmlənməsi Ümummilli Lider Heydər Əliyevin müdrik siyasəti ilə bağlıdır. Ulu Öndərin ideyalarını Prezident İlham Əliyevin rəhbərliyi ilə Yeni Azərbaycan Partiyası uğurla davam etdirir və ölkəmizi yeni inkişaf mərhələsinə aparır.
Sonra rayon təşkilatının ictimai-siyasi həyatında fərqlənən bir qrup partiya üzvünə fəxri fərman, partiya sıralarına yeni qoşulanlara isə üzvlük vəsiqələri təqdim olunub.
Tədbir Yeni Azərbaycan Partiyasının Himninin səsləndirilməsi ilə başa çatıb.
