Xəbərlər
“Yeni Azərbaycan Partiyası cəmiyyətin və ölkənin inkişafında aparıcı qüvvədir”
Yeni Azərbaycan Partiyası (YAP) Xızı rayon təşkilatı tərəfindən “Konstitusiya və Suverenlik İli” çərçivəsində partiyanın təsis edilməsinin 33-cü ildönümünə həsr olunmuş “Yeni Azərbaycan Partiyası cəmiyyətin və ölkənin inkişafında aparıcı qüvvədir” adlı tədbir keçirilib.
Əvvəlcə müasir müstəqil Azərbaycanın qurucusu Ümummilli Lider Heydər Əliyevin abidəsi ziyarət edilərək önünə gül dəstələri düzülüb.
Tədbirdə Ümummilli Lider Heydər Əliyevin və Azərbaycanın müstəqilliyi və suverenliyi uğrunda canından keçmiş şəhidlərin xatirəsi bir dəqiqəlik sükutla yad olunub. Azərbaycan Respublikasının Dövlət Himni səsləndirilib.
Sonra Yeni Azərbaycan Partiyasının yaradılmasının 33-cü ildönümünə həsr olunmuş videoçarx nümayiş etdirilib.
Giriş nitqi ilə çıxış edən Xızı Rayon İcra Hakimiyyətinin müavini Arzu Əzizov Yeni Azərbaycan Partiyasının 33-cü ildönümü münasibətilə tədbir iştirakçılarını təbrik edərək, YAP-ın ölkəmizin siyasi sistemində müstəsna rol oynadığını bildirib. O qeyd edib ki, Xızı rayonunda həyata keçirilən sosial-iqtisadi layihələr, inkişaf proqramları və əhaliyə göstərilən xidmətlər Ulu Öndər Heydər Əliyevin siyasi xəttinin uğurlu icrasının nəticəsidir.
YAP Xızı rayon təşkilatının sədri Ayaz Quliyev bildirib ki, Yeni Azərbaycan Partiyası bu 33 il ərzində ölkəmizin inkişaf tarixində özünəməxsus bir məktəb formalaşdırıb. Partiyamızın əsas məqsədi dövlətçilik ideyalarının qorunması, cəmiyyətin inkişafına xidmət edilməsi və gənclərin dövlətçilik ruhunda yetişdirilməsidir. “Xızı rayon təşkilatı olaraq biz partiyanın qarşıya qoyduğu bütün vəzifələrin icrasında fəal iştirak edir, rayonumuzun tərəqqisinə töhfə vermək üçün əzmlə çalışırıq”.
RİH ərazi partiya təşkilatının sədr müavini Tünzalə İmranova və Xızı şəhər tam orta məktəbinin direktoru Zaur Zeynallı Yeni Azərbaycan Partiyasının fəaliyyəti, partiyanın cəmiyyətin müxtəlif sahələrində yaratdığı müsbət dəyişikliklər və inkişaf istiqamətləri barədə danışıblar.
Çıxışlardan sonra partiyanın ictimai-siyasi fəaliyyətində fərqlənən şəxslərə fəxri fərman, partiyaya yeni qəbul olunanlara üzvlük vəsiqələri təqdim olunub.
Tədbir Yeni Azərbaycan Partiyasının Himninin səsləndirilməsi ilə yekunlaşıb.
