Xəbərlər
Yevlaxda YAP-ın 33 illiyi münasibətilə tədbir keçirilib
Yeni Azərbaycan Partiyası (YAP) Yevlax rayon təşkilatının və Yevlax Şəhər İcra Hakimiyyətinin birgə təşkilatçılığı ilə partiyanın təsis edilməsinin 33 illiyi münasibətilə “Yeni Azərbaycan Partiyası Ulu Öndər Heydər Əliyevin ən böyük siyasi mirasdır” mövzusunda tədbir keçirilib.
Tədbir iştirakçıları əvvəlcə Ulu Öndər Heydər Əliyevin şəhərin mərkəzi meydanında ucaldılmış abidəsini ziyarət edib, önünə gül dəstələri düzüb, dahi şəxsiyyətin əziz xatirəsini ehtiramla yad ediblər.
Azərbaycanın Dövlət Himninin səsləndirilməsi ilə başlanan tədbirdə Ulu Öndər Heydər Əliyevin və ölkəmizin ərazi bütövlüyü və suverenliyi uğrunda canını qurban verən şəhidlərin əziz xatirəsi ehtiramla yad edilib.
Tədbirdə çıxış edən YAP Yevlax rayon təşkilatının sədri Rafiq Əliyev, Yevlax Şəhər İcra Hakimiyyətinin başçısı Anar Tağıyev partiyanın 33 il ərzində keçdiyi şərəfli yol haqqında danışıblar. Natiqlər Ümummilli Liderimiz Heydər Əliyevin rəhbərliyi ilə partiyanın tarixi zərurətdən yaranaraq Azərbaycanın ərazi bütövlüyünün bərpa olunması və dövlət müstəqilliyinin möhkəmləndirilməsi istiqamətindəki mühüm işlərdən və Yeni Azərbaycan Partiyasının Sədri, Prezident, Müzəffər Ali Baş Komandan İlham Əliyevin müdrik fəaliyyəti ilə ölkəmizin işıqlı gələcəyə doğru uğurla addımlamasından bəhs ediblər.
Partiyanın veteran üzvü Vahid Quliyev, partiya fəalı, Yevlax rayon Salahlı kənd tam orta məktəbinin direktoru Lalə Məmmədova və partiya fəalı, Mingəçevir Dövlət Universitetinin tələbəsi Nilufər Abbasova YAP-ın yarandığı gündən Azərbaycanın ən güclü və mütəşəkkil siyasi qüvvəsinə çevrildiyini qeyd ediblər.
Tədbirdə Yevlax rayonunun ictimai-siyasi həyatında fəal iştirak edən bir qrup şəxs fəxri fərmanla təltif edilib, partiya sıralarına yeni qəbul edilmiş şəxslərə üzvlük vəsiqələri təqdim olunub.
Sonra Yeni Azərbaycan Partiyasının Himni səsləndirilib.
Tədbirin bədii hissəsində Fikrət Əmirov adına Gəncə Dövlət Filarmoniyasının solisti, Respublikanın əməkdar mədəniyyət işçisi Mehbarə Cəfərovanın və pianoçu Mehriban Allahverdiyevanın təqdimatında milli musiqilər səsləndirilib.
