Seçki-2024
Tərtərdə seçicilərlə görüşlər davam etdirilir
2024-cü il fevralın 7-də ölkəmizdə keçiriləcək prezident seçkiləri ilə əlaqədar Yeni Azərbaycan Partiyası tərəfindən namizədliyi irəli sürülmüş İlham Heydər oğlu Əliyevin seçkiqabağı təşviqat kampaniyası çərçivəsində yanvarın 19- da Tərtər rayonunun Qaradağlı, Kəngərli, Təzəkənd sakinləri və rayon təhsil işçiləri ilə görüş keçirilib.
Görüşdə YAP Tərtər rayon təşkilatının sədri Eldar Əsədov, Milli Məclisin deputatı Ağalar Vəliyev, təşviqat qrupunun üzvləri Amil Hüseynov, Kamil Məmmədov, Pərvanə Xuduyeva və digərləri çıxış ediblər.
Əvvəlcə Azərbaycanın Dövlət Himni səsləndirilib, Ulu Öndər Heydər Əliyevin və Vətən uğrunda canlarından keçən qəhrəman oğulların xatirəsi bir dəqiqəlik sükutla yad edilib.
Natiqlər bildiriblər ki, Yeni Azərbaycan Partiyası bu seçkilərə “Qalib xalqın qalib Lideri!” şüarı ilə gedir. Görüşdə çıxış edənlər son 20 il ərzində təməli Ümummilli Lider Heydər Əliyev tərəfindən qoyulmuş inkişaf strategiyasının, Prezident İlham Əliyevin inamla davam etdirdiyi ölkəmizdə taleyüklü məsələlərin həllində müstəsna roluna diqqət çəkiblər. Bildirilib ki, xalqımıza böyük qürur bəxş edən Vətən müharibəsində əldə olunan Zəfərdən sonrakı hərbi-siyasi proseslər məhz Prezident İlham Əliyevin “Dəmir yumruğ”unun qətiyyətinin ifadəsidir. Azərbaycan Ordusunun cəmi 44 gün ərzində həyata keçirdiyi əməliyyatlarda, eyni zamanda, diplomatik masada işğalçı ölkənin oyunlarını pozan və qələbə əldə edən cənab İlham Əliyev Silahlı Qüvvələrin Ali Baş Komandanı kimi qalib Lider olduğunu isbatladı.
Çıxış edənlər seçiciləri 7 fevralda məntəqələrə gedərək Azərbaycana Zəfər bəxş etmiş qalib xalqın qalib Lideri cənab İlham Əliyevə səs verməyə dəvət ediblər.
Sonda Yeni Azərbaycan Partiyasının Himni səsləndirilib.
