Xəbərlər
Daha parlaq gələcəyə doğru mətin addımlarla
Bayram Aslanov
YAP İdarə Heyətinin üzvü, YAP Gəncə şəhər təşkilatının sədri
Azərbaycan Prezidenti İlham Əliyev yanvarın 10-da yerli televiziya kanallarına müsahibəsində ölkəmizin siyasi, iqtisadi, diplomatik sahədə qazandığı nailiyyətləri, bu günün real hadisələrini, dövlətimizin haqqa, ədalətə söykənən, beynəlxalq hüquq normalarına əsaslanan mövqeyini geniş şəkildə əks etdirdi.
Dünya miqyasında güclü ölkələr sırasında addımlayan Azərbaycanın 44 günlük Vətən müharibəsindəki Qələbəsindən sonrakı dövrdə həm beynəlxalq əlaqələr müstəvisində, həm də ölkə daxilində həyata keçirilən uğurlu siyasət, Azərbaycanın yaratdığı yeni reallıqlarla bağlı fikirlər xüsusilə diqqəti cəlb edib.
Üç saata yaxın davam edən müsahibədə dövlət başçısı cənab İlham Əliyev Azərbaycanın hər zaman sülhün tərəfdarı olduğunu bir daha nümayiş etdirdi: “Ədalətə inanmaq üçün əsas olmalıdır. Onu da biz hamımız bilməliyik ki, ədalət özü-özünə gəlmir, ədaləti sən gərək təmin edəsən. Müasir dünyada biz bunu artıq çoxdan başa düşmüşük. Əgər mənim çıxışlarıma nəzər salsanız, bəlkə də son 10-15 il ərzində mən dəfələrlə deyirdim ki, dünyada beynəlxalq hüquq işləmir. Bu mexanizmlər ancaq zəif ölkələr üçün işə salınır. Böyük dövlətlər buna məhəl qoymur. Onlar üçün sanki qanun qanun deyil, beynəlxalq hüquq hüquq deyil. Belə olan halda, ədaləti tələb edən, haqlı olaraq tələb edən ölkələr bu ədaləti özləri təmin etməlidir. Biz, məhz bu prinsipi rəhbər tutaraq son illər ərzində fəal işləmişik və ədaləti özümüz bərpa etmişik. Ona görə bu, o cümlədən bu nöqteyi-nəzərdən də önəmlidir, çünki ədalətə inam bərpa edildi. Yəni, biz hamımız gördük ki, bəli, ədalət zəfər çalıb, biz öz haqq işimizi yekunlaşdırmışıq və ədaləti özümüz bərpa etmişik. Ölkəmiz qalib tərəf olsa da, humanizm prinsiplərinə əsaslanaraq, müharibə tərəfdarı olmadığını bəyan edir.”
“Müasir tariximizin yeni dövrü məhz sentyabrın 20-dən sonra başlayır” deyən Qalib ölkəmizin Qalib Prezidenti İlham Əliyev ölkəmizin həyatında yeni dövrün başladığına diqqət çəkib: “Sentyabr ayında biz elə bir dövrə yekun vurmuşuq ki, bu, epoxal bir hadisədir. Yəni, Azərbaycanın çoxəsrlik tarixində mən hesab edirəm ki, buna oxşar Zəfər olmamışdır. Bütün amilləri - siyasi, hərbi və 30 illik işğalı, ərazinin relyefini, müdafiə xətlərinin çox olmasını nəzərə alsaq hesab edirəm ki, bu, xalqımızın, dövlətimizin ən parlaq Qələbəsidir. Təbii ki, bu yeni dövr başlayarkən, əlbəttə, prezident seçkiləri də bu yeni dövrün başlanğıcı olmalıdır. Çünki hər bir dövr bir zaman kəsiyidir və 30 il ərzində işğal altında olmuş ərazilərin işğaldan azad edilməsi və suverenliyi tam bərpa etməyimiz yeni dövrün başlanğıcı idi.”
Dünyanın aparıcı KİV-lərində Prezident İlham Əliyevin yanvarın 10-da yerli televiziya kanallarına verdiyi müsahibəsi geniş işıqlandırılıb və ölkə başçımızın Ermənistanla sülh danışıqlarına dair fikirlərinə xüsusi önəm verilib: “Ermənistan istəyir ki, bu sülh müqaviləsinin zəmanətçiləri olsun. Biz hesab edirik ki, buna heç bir ehtiyac yoxdur. Bu, iki suveren dövlət arasında imzalanacaq sülh müqaviləsidir. Biz orada heç bir zəmanətçilərə ehtiyac duymuruq və əgər bu, ikitərəfli formatda imzalanacaqsa, imzalanmalıdır. Əgər kimsə kömək etmək istəyirsə, biz buna da etiraz etmirik. Ancaq bu kömək elə olmalıdır ki, məcburi olmasın.”
Zəngəzur dəhlizinin açılmasının vacibliyi barədə fikrlər də diqqəti çəkib. “Azərbaycandan Azərbaycana insanlar və yüklər heç bir yoxlama aparılmadan keçməlidir. Əks təqdirdə, Ermənistan əbədi dalan kimi qalacaq və əgər, dediyim marşrut açılmasa, biz Ermənistanla heç bir başqa yerdə sərhədimizi açmaq fikrində deyilik”. Azərbaycan Prezidentinin qətiyyətlə dediyi bu fikir Zəngəzur dəhlizinin açılmasının qaçılmaz olduğunu və bu layihənin ölkəmizlə yanaşı region üçün strateji bir layihə olduğunu təsdiq edir.
Yeni dövrün başlanğıcında, cənab İlham Əliyevin Prezident kimi uğurlu fəaliyyətinin 20 ili tamamlandığı bir vaxtda prezident seçkilərinin keçirilməsinə diqqət çəkən dövlət başçımız bildirib ki, bu da bir dövrdür və bunu da biz bir yekun kimi qəbul etməliyik və 20 ildən sonra yenidən prezident seçkilərinin keçirilməsi təbii ki, bu xronoloji dövrü də əsaslandırmış olur. Yəni, əsas səbəblər bunlardır. Amma mən bu səbəbləri, bu sıralamanı əhəmiyyət üzrə etmişəm. Birinci səbəb, əlbəttə ki, yeni dövrün başlanğıcıdır və prezident seçkiləri bu yeni dövrə də xeyir-dua verəcəkdir.
Bəli, son 20 ilin tarixi göz qabağındadır. Qalib Prezidentimizin geniş müsahibəsi bir daha dünya ictimaiyyətində dövlətimizin bugünkü qüdrəti və gələcək hədəfləri barədə aydın təsəvvür yaratdı. Regionda təhlükəsizliyin, əməkdaşlığın, rifahın təmin edilməsi təşəbbüsləri ilə çıxış edən Azərbaycanın son 20 illik tarixi, Zəfərimizdən ötən üç ildə keçdiyi yol da onu təsdiq edir ki, Azərbaycan xalqı 2003-cü ildə düzgün seçim edib. Məhz bunun üçün də bu gün Azərbaycan dövləti tarixinin ən güclü dövrünü yaşayır. Bu bir reallıqdır. Prezident İlham Əliyevin yürütdüyü tam müstəqil siyasətin nəticəsində ölkəmiz qüdrətli, dünya miqyasında etibarlı tərəfdaş olan dövlətə çevrilib və yeni hədəflərə, daha parlaq gələcəyə doğru mətin addımlarla irəliləyəcək.