YENİ AZƏRBAYCAN PARTİYASI

Yeni Azərbaycan Partiyası dünənin, bu günün və gələcəyin partiyasıdır!
ÜZVLƏRİN SAYI : 0
BİZƏ YAZIN

Xəbərlər

Nərimanovda 31 Mart - Azərbaycanlıların Soyqırımı Gününə həsr olunmuş tədbir keçirilib

Yeni Azərbaycan Partiyası (YAP) Nərimanov rayon təşkilatı və Odlar Yurdu Universitetinin birgə təşkilatçılığı ilə 31 Mart - Azərbaycanlıların Soyqırımı Gününə həsr olunmuş tədbiri keçirilib.

Əvvəlcə Odlar Yurdu Universitetinin tələbələrinin əl işlərindən ibarət 31 Mart - Azərbaycanlıların Soyqırımı Gününə həsr olunan rəsm sərgisinə baxış keçirilib.

Tədbirdə Azərbaycan Respublikasının Dövlət Himni səsləndirilib, Ulu Öndər Heydər Əliyevin, Vətənimizin bütövlüyü uğrunda canından keçmiş şəhidlərimizin, soyqırımı qurbanlarının əziz xatirəsi bir dəqiqəlik sükutla anılıb.

Sonra 31 Mart soyqırımı zamanı Azərbaycanlılara qarşı erməni vandalları tərəfindən törədilmiş vəhşiliyi özündə əks etdirən video-çarx izlənilib.

Tədbirdə YAP Nərimanov rayon təşkilatının sədri Samir Vəliyev çıxış edərək bildirib ki, tariximizin müəyyən dövrlərində ermənilər mifik “Böyük Ermənistan” ideyasını gerçəkləşdirmək məqsədilə soydaşlarımıza qarşı etnik təmizləmə, deportasiya və soyqırımlar həyata keçiriblər. Xalqımızın başına gətirilən ən dəhşətli faciələrdən biri 1918-ci ilin mart-aprel aylarında Bakı Sovetinin mandatı altında fəaliyyət göstərən daşnak-bolşevik silahlı dəstələri tərəfindən xüsusi qəddarlıqla törədilmiş kütləvi qırğınlardır. Həmin vaxt on minlərlə dinc sakin məhz etnik və dini mənsubiyyətinə görə məhv edilib. Həmçinin yaşayış məntəqələri dağıdılıb, mədəniyyət abidələri, məscidlər və digər ibadət yerləri yerlə yeksan edilib. Kütləvi qətllər və talanlar Bakı ilə yanaşı, Qarabağda, Zəngəzurda, Naxçıvanda, İrəvanda, Göyçədə və digər bölgələrdə də törədilib.

S.Vəliyev qeyd edib ki, Azərbaycan xalqına qarşı törədilmiş bütün soyqırımı faciələrini qeyd etmək məqsədi ilə 1998-ci ildə Ulu Öndər Heydər Əliyev “Azərbaycanlıların soyqırımı haqqında” Fərman imzalayıb: “Eləcə də həmin Fərmanla martın 31-i “Azərbaycanlıların Soyqırımı Günü” elan edilib. Eyni zamanda dövlətimizin başçısı cənab İlham Əliyevin 2009-cu ildə imzaladığı Sərəncamla Quba şəhərində “Soyqırımı memorial kompleksi” yaradılıb. Bütün bunlar erməni şovinizmi və terrorizminin ifşa olunması və dünyaya çatdırılması, xalqımızın gələcək nəsillərinin milli yaddaşının qorunması, soyqırımı qurbanlarının xatirəsinin əbədiləşdirilməsi baxımından son dərəcə əhəmiyyətli addımlardır”.

S.Vəliyev vurğulayıb ki, Azərbaycanın parlaq Qələbəsi ilə başa çatan 44 günlük Vətən müharibəsində ermənilərin xalqımıza qarşı törətdikləri bütün cinayətlərin cavabı layiqincə verilib.

Tədbirdə digər çıxış edənlər ermənilərin Azərbaycan ərazisinə köçürülməsinin tarixindən və məqsədlərindən, bu siyasətin acı nəticələrindən, 1918-ci il mart soyqırımından, həmçinin 44 günlük Vətən müharibəsindən, Azərbaycan Ordusunun qüdrətindən, Ali Baş Komandan İlham Əliyevin sərkərdəlik məharətindən danışıblar.