Xəbərlər
İdarəetmənin ustadı, siyasətin kamil bilicisi
Kamil Qurbanlı
YAP Biləsuvar rayon təşkilatının sədri
“Heydər Əliyev dahi şəxsiyyət, böyük liderdir, uzaqgörən, cəsarətli siyasi xadimdir. O, bütün dövrlərdə Azərbaycan xalqına sədaqətlə xidmət edirdi, xalq üçün yaşayırdı, yaradırdı. Heydər Əliyev Azərbaycana iki dəfə rəhbərlik etmişdir. Hər iki dəfə Azərbaycanı təhlükədən, böhrandan çıxarıb inkişaf yoluna qoymuşdur. Bu onu göstərir ki, ictimai-siyasi quruluşdan asılı olmayaraq, Heydər Əliyev həmişə ən düzgün siyasət aparmış, Azərbaycan xalqının maraqlarını müdafiə və təmin etmişdir”
Prezident İlham Əliyev
Hər bir xalqın dövlətçilik təcrübəsini əks etdirən başlıca amil o xalqın keçdiyi mübarizə yoludur. Xalqın dəf etdiyi hadisə və proseslər tarixi əhəmiyyətə malik məqamlardır. Məhz buna görə dünyaya töhvələr vermiş xalqların özünəməxsus təcrübələri vardır. Xalqımızda bu baxımdan istisna deyildir. Xalq olaraq uzun əsrlər boyu öz milli dəyərlərimizi nümayiş etdirmişik. Hələ ötən əsrdə, 1918-ci ildə dünyanın şərq yarımkürəsində Respublika yaradan, 1991-ci ildə milli dövlətini bərpa edən, 30 il düşmən işğalında qalan torpaqlarını Ali Baş Komandanı və ordusunun iradəsinə sığınaraq azad edən xalqıq. Bütün bu nümunələrin fonunda başlıca amil kimi milli lider faktoru olmuşdur. Zamanından asılı olmayaraq məhz milli lider amilinin hadisə və proseslərin gedişində həlledici olduğu danılmazdır. Qüdrətə, həmrəyliyə, gücə, tərəqqiyə nail olmaq yolunda lider həmişə ən mühüm faktor olmuşdur.
Lidersiz, nə rifahı, nə tərəqqini, nə də yüksəlişi təsvvür belə etmək mümkün deyildir. Bunun bariz nümunəsini xalqımız Ulu Öndər Heydər Əliyevin simasında bəşəriyyətə sübut etmişdir.
Təsadüfü deyil ki, xalqımızın də dövlətimizin taleyi Heydər Əliyevin adı ilə qırılmaz tellərlə bağlıdır. Xalqının keçmişi, bu günü, gələcəti ilə daim qürur duyduğunu qeyd edən Heydər Əliyev özü bir dəyərə çevrildi.
O, dövlər qurdu, o xalqını səfərbər edə bildi, o, dünyaya səs saldı, “Azərbaycan dünyaya günəş kimi doğacaqdır” dedi. Və buna nail oldu. O, dünyada yaşayan bütün Azərbaycanlıların qürur mənbəyi olan müasir Azərbaycan dövlətini qurdu, xalqının xilaskarı və lideri oldu. Heydər Əliyev deyirdi: -“Mənim həyat amalım bütün varlığım qədər sevdiyim Azərbaycan xalqına, dövlətçiliyimizə, ölkəmizin iqtisadi, siyasi, mənəvi inkişafına xidmət olub. Bu yolda bütün gücümü və iradəmi yalnız müdrik və qədirbilən xalqımdan almışam. Ən çətin anlarda, ən mürəkkəb vəziyyətlərdə yalnız və yalnız xalqıma arxalanmışam. Bu da mənə dözüm, iradə verib və bütün uğurlarımı təmin edib“.
Heydər Əliyevin hələ 1969-cu ilin iyulunda Azərbaycan SSRİ-nin rəhbərliyinə gəlişi ilə ölkəmizin təkcə iqtisadi göstəriciləri yüksəlmədi, həm də milli-mənəvi dəyərlərimiz qorundu, aşınmadan xilas oldu və gələcək inkişaf üçün möhkəm təməllərə əsaslanan inkişaf strtegiyasına start verildi. Məhz o zamana qədər dövlət idarəçiliyinin düzgün təşkil olunmaması tənəzzülə zəmin yaratmış, səbəb olmuşdu. Heydər Əliyevə qədər Azərbaycan bütün istiqamətlər üzrə keçmiş Sovetlər birliyinin ən geridə qalmış ölkələri sırasında idi. Bu vəziyyət məhz Azərbaycan KPMK-nin 19 iyul 1969-cu il tarixli plenimundan sonra əsaslı surətdə dəyişdi. Plenumda Heydər Əliyev birinci katib seçilməsi ölkənin sovet dövrü tarixinin dönüş nöqtəsi oldu. Azərbaycanda kənd təsərrüfatının, neft sənayesinin və bütövlükdə sənayeləşmənin inkişafında yeni dövr başladı. Elm və təhsil sahəsində, əhali məşğulluğunu təminatında, tikinti, quruculuq, abadlıq sahələrində yeni yüksəlişə start verildi. Bütün istiqamətlər üzrə həyata keçirilən islahatlar, görülən işlər respublikanın müstəqil dövlət kimi fəaliyyət göstərməsi üçün möhkəm zəmin yaratdı.
Heydər Əliyev 1982-ci ildə Sovet İttifaqının Nazirlər Soveti sədrinin birinci müavini vəzifəsinə təyin edildi. Beləliklə Heydər Əlyev SSRİ kimi nəhəng ölkənin nəqliyyat, sənaye, səhiyyə, təhsil, tikinti, gənclərlə iş kimi mühüm sahələrinə rəhbətlik etdi. Eyni zamanda Cənub Şərqi və Mərkəzi Asiya, Yaxın Şərq, Latın Amerikası kimi regionlarla aparılan işlərə rəhbərlik və nəzarəti həyata keçirirdi. Sovet İttifaqının ən nəhəng tikinti işlərinə rəhbərliklə Heydər Əliyevin səlahiyyətində idi.
Heydər Əliyev 1985-ci ilin martında Sovet İttifaqının Baş Katibi seçilən Mixail Qarbaçovun “aşkarlıq”, “yenidənqurma”, “sürətləndirmə” adı altında həyata keçirməyə başladığı sosial-siyasi və iqtisadi konsepsiyaya etiraz olaraq 1987-ci ilin oktyabr ayında tutduğu vəzifələrində istefa verdi.
Heydər Əliyev Sovet İttifaqının əsas simalarından olduğu müddətdə də Azərbaycanın qayğı və problemlərinə xüsusi diqqət ayırmış, ölkəmizin inkişafı ilə bağlı çoxsaylı yeni qərarların qəbuluna nail olmuşdur. Məhz onun sayəsində Azərbaycan iqtisadiyyatı durmadan böyüyür, əhali inkişafı məsələləri sürətlə həllini tapırdı.
Onun Sovet İttifaqı rəhbərliyindən getməsi təkcə Azərbaycanın deyil, bütövlükdə İttifaqın ziyanına oldu. Onun dəmir iradəsi, dürüst məntiqi, cəsarəti bir çoxlarını qane etmirdi.
İdarəetmənin ustadı, siyasətin kamil bilicisi olan Heydər Əliyev o zamanlar Moskvada yaşasada onun ürəyi öz ölkəsi, vətəni Azərbaycanla döyünür, daim bütün prosesləri, Azərbaycan ətrafında baş verilənləri izləyir və hər dəfə öz münasibətini ifadə edirdi.
Artıq əsrin 80-ci illərinin sonuna doğru Sovetlər Birliyi sürətlə zəifləyir, ölkə iqtisadiyyatı çökür, hərc-mərclik, korrupsiya, rüşvətxorluq dövləti dağılmağa doğru aparırdı. Belə bir vəziyyəti fürsət bilən bir sıra millətlər öz niyyətlərini gerçəkləşdirmək, dağılmaqda olan ittifaqdan daha çox “pay” qoparmaqdan ötrü hərəkətə keçmişdilər. Onların sırasında mənfur qonşularımız olan ermənilər də var idi.
Azərbaycanın da bir parçası olduğu Sovet İttifaqının tənəzzülü ölkəmizdə də çoxlu problemlərin yaranmasına səbəb olmaqla yanaşı, Ermənistandan azərbaycanlıların qaçqın düşməsi, Qarabağda ermənilərin silahlı münaqişə cəhdləri, 20 yanvar hadisələri Heydər Əliyevi narahat edir, o əlində olan bütün imkanlardan istifadə etməklə xalqının yaralarına məlhəm olmağa çalışırdı.
Nəhayət Sovet İttifaqının süqutu Azərbaycanda hakimiyyət uğrunda gedən mübarizə, ölkədəki özbaşınalıq, az qala hər ay baş verməkdə olan hakimiyyət dəyişiklikləri ermənilərin Qarabağ torpaqlarında müharibəsi fonunda baş verirdi. 1992-ci ilin yazında hakimiyyəti zəbt etmiş AXC-Müsavat qüvvələrinin səriştəsiz, dövlət idarəçiliyindən bixəbər, hakimiyyəti əldə saxlamaq naminə torpaqlarımızın işğalı prosesini kənardan seyr edən, mövcud beynəlxalq siyasi situasiyaya, Azərbaycanın gücünə adekvat olmayan bəyanatlarla mövqe sərgiləyən “dövlət xadimləri” Azərbaycanı uçurumun astanasına gətirməyə “nail” oldular. Belə bir məqamda məhz Heydər Əliyev bütün ölkənin, yeganə ümüd yeri, xilas mənbəyi idi. Məhz onun dühası Azərbaycanı dövlət olaraq ayaqda saxlaya bilərdi.
Bütün xalqımızın ümüdlərini ifadə edən Azərbaycanın görkəmli şəxsiyyətləri, tariximizə “91-lər” kimi düşən vətənini, dövlətinini, xalqını sevən şəxsiyyətlərin Heydər Əliyevə xilaskarlıq missiyasını öz üzərinə götürməklə bağlı müraciətləri cavabsız qalmadı. Gərgin, çətin və mürəkkəb situasiyada Heydər Əliyevin ölkənin paytaxtına gəlişi, vətəndaş müharibəsi astanasında olan cəmiyyətimizdə ümüd yaratdı. O, qısa müddətdə konkret əməli addımlar ataraq Azərbaycanı parçalanmadan, növbəti dəfə dövlətçiliyin itirilməsi təhlükəsindən xilas etdi. Heydər Əliyevin dövlət idarəçiliyindəki ustalığı xalqımız üçün yeni üfüqlər açdı.
Ölkə seçicilərin tam əksəriyyətinin etimadı nəticəsində dövlət başçısı seçilən Heydər Əliyev vətəndaş müharibəsi təhlükəsini aradan qaldırdı. Qarabağda baş verən qanlı toqquşmaları durdura bildi, müasir Azərbaycan Respublikasının Konstitusiyasının əsaslarını işləyib hazırladı və təmin etdi. Onun sayəsində ölkə iqtisadiyyatının həcmi hər il ötən ilə nisbətən genişlənirdi.
Torpaq islahtlarına, xarici sərmayədarlarla beynəlxalq kantraktların imzalanmasına, bütün istiqamətlər üzrə yeniliklərə start verildi. Bir sözlə müasir, güclü, öz göstəricilərinə görə nəhəng iqtisadiyyata malik, ciddi təməllər üzərində qurulan dövlətçilik prinsipləri əsasında bərqarar olmuş idarəçilik sistemi, qüdrətli müdafiə qabiliyyəti olan ordu, ildən-ilə inkişaf edən sosial-iqtisadi, siyasi-mədəni münasibətlər sistemi Heydər Əliyev şəxsiyyətinin təkcə Azərbaycan Respublikası əhalisinin deyil, bütün dünya azərbaycanılarının fəxarət yeri olan Azərbaycan dövlətinin formalaşması və inkişafı üçün əsas oldu.
İndi deyə bilirik ki, Azərbaycan dünyaya günəş kimi doğmuşdur. Nəinki, dövlətimiz qarşıda duran sosial-iqtisadi, mədəni-siyasi problemlər öz həllini tapmış, eyni zamanda 100 illər ərzində əldə edə bilmədiyimiz tarixi nailiyyətlərə imza atılmışdır.
Nə xoşbəxt xalqdır ki, Heydər Əliyev kimi dahi, dövlət idarəçilik ustadı, dünya siyasətinin kamil bilicisi olan şəxsiyyətin bu gün bütün istiqamətlər üzrə dövlətimizə və xalqımıza ləyaqətlə xidmət edən övladı - Müzəffər Ali Baş Komandan, dünyanın istənilən yerində bizləri cəsarətlə təmsil edən prezident, Yeni Azərbaycana Partiyasının sədri İlham Əliyev var. Təməli Heydər Əliyev tərəfindən qoyulmuş Müasir Azərbaycan dövlətinin bu günki inkişafı, möhtəşəmliyi məhz İlham Əliyevin Heydər Əliyev ideyalarını uğurla həyat keçirməsi, dünyada baş verən hadisə və proseslərə adekvat münasibətinin nəticələridir.