Xəbərlər
Başqa yol yoxdur
Rüstəm Nağıyev
YAP Gədəbəy rayon təşkilatının sədri
Oktyabrın 6-da Çex Respublikasının paytaxtı Praqada təşkil olunmuş “Avropa siyasi birliyi” Zirvə Toplantısına Azərbaycanın dəvət olunması ölkəmizin Aİ ölkələri ilə əməkdaşlıq perspektivlərinin getdikcə genişləndiyindən xəbər verir. Prezident İlham Əliyevin Praqaya səfəri zamanı Avropa İttifaqı Şurasının Prezidenti, Fransa Prezidenti və Ermənistanın baş naziri ilə keçirdiyi görüşlər Azərbaycan-Ermənistan münasibətlərinin nizamlanması baxımından xüsusi əhəmiyyət kəsb edir. Dövlətimizin başçısı keçirdiyi görüşlərdən sonra Praqada Azərbaycan telekanallarına verdiyi müsahibəsində qeyd etdi ki, Ermənistanla sülh müqaviləsinin imzalanmasına doğru ciddi addımlar atılıb. Bununla belə Prezident İlham Əliyev Ermənistanın ölkəmizə qarşı hələ də terror siyasəti yürütməkdən əl çəkmədiyini vurğulayıb. Məlumdur ki, İkinci Qarabağ müharibəsi başa çatandan sonra ermənilər tərəfindən ən Azərbaycan torpaqlarında azı 1400 mina basdırılıb. Bu danılmaz fakt Ermənistan hökumətinin hərbi cinayətlərinin davam etdiyini isbatlayır. Əlbəttə ki, rəsmi İrəvanın bu addımları Cənubi Qafqazda sülhün bərqərar olunması istiqamətində göstərilən səylərə zərər gətirir. Vətən müharibəsi başa çatdıqdan sonra 250-dən çox azərbaycanlı minaların partlaması səbəbilə ya həlak olub, ya da ki, ağır yaralanıb. Bizə qarşı erməni terroru davam edir və buna son qoyulmalıdır.
Lakin minaların basdırılması yeganə cinayət deyil. Bu günə qədər erməni silahlı birləşmələri hələ də bizim torpağımızdan tam çıxarılmayıb. Azərbaycan hələ ki, təmkin nümayiş etdirir. Lakin bu uzun müddət davam edə bilməz. Prezident İlham Əliyevin dediyi kimi, Qarabağ Azərbaycandır və bu gün dünya birliyi bu həqiqəti artıq nəinki dərk edir, həm də bunu tələffüz edir.
Azərbaycan Ermənistana sülh təklif edib. Sülh müqaviləsinin beş prinsipi mümkün qədər tez paraflanmalıdır və sazişin mətni üzərində iş bu prinsiplər əsasında təxirə salınmadan başlamalıdır. Ermənistan tərəfindən xoş məram olarsa, sülh müqaviləsi ilin sonunadək imzalana bilər. Vaxt keçir, Azərbaycanın xoşməramlı təşəbbüsləri heç də asan irəliləmir. Bununla belə müsbət tendensiya da müşahidə olunmaqdadır. Dövlətimizin başçısı da öz müsahibəsində vurğuladı ki, xarici işlər nazirlərinin birinci görüşü konkret nəticələr verməsə də bu, müsbət addımdır. Yaxın vaxtlarda qərar qəbul edilərsə, iki ölkənin işçi qrupları sülh müqaviləsinin mətni üzərində işləməyə başlayacaqlar. Vacib məqamlardan biri də budur ki, Azərbaycan tərəfindən elan edilən beş prinsipə qarşı heç bir tərəfdən etiraz və suallar yoxdur.
Həmçinin Prezident İlham Əliyev öz müsahibəsində Qarabağda yaşayan ermənilər məsələsi ilə bağlı da dövlətimizin qəti mövqeyini bir daha ifadə etmişdir. Dövlətimizin başçısı birmənalı olaraq bildirmişdir ki, həmin insanlar bizim vətəndaşlarımızdır və onların taleyini, onların gələcək həyatını Azərbaycan hər hansı bir ölkə ilə müzakirə etmək fikrində deyil. Bu, bizim daxili işimizdir və bütün Azərbaycan vətəndaşları hansı hüquqlara malikdirlərsə, ermənilər də o hüquqlara malik olacaqlar. Azərbaycan hökuməti Qarabağın erməni əhalisinin nümayəndələri ilə qeyri-formal əlaqələri davam etdirməyi planlaşdırır. Belə əlaqələr artıq müəyyən müddətdir ki, təcrübə olunur və bu, hələlik Rusiya sülhməramlı kontingentinin məsuliyyət zonasında yaşayan əsas əhali ilə tam anlayışa gətirib çıxaracaq. Çünki Azərbaycan cəmiyyətinə inteqrasiyanın, sadəcə, başqa yolu yoxdur.