Xəbərlər
44 günlük Vətən müharibəsi gələcəyimizə işıq saldı
Ali Baş Komandan, Prezident İlham Əliyevin əmri ilə 2020-ci ilin 27 sentyabr tarixində Şanlı Azərbaycan Ordusunun erməni təxribatına verdiyi cavab, uğurlu “Dəmir Yumruq” əməliyyatı Vətənimizin, bütövlükdə regionun tarixini dəyişdi.
Azərbaycan Ordusunun şücaəti sayəsində 44 günlük Vətən müharibəsində erməni silahlı birləşmələri, düşmən qüvvələrinin Azərbaycan torpaqları hesabına "Böyük Ermənistan" yaratmaq xülyası tamamilə darmadağın edildi, Ali Baş Komandanın əmrinə hər an müntəzir dayanan hərbçilərimiz düşməni doğma torpaqlarımızdan biabırcasına qovdu.
Bunu YAP Gəncə şəhər təşkilatının sədri Ramil Orucov bildirib. O, qeyd edib ki, Azərbaycanın tarixi qələbəsi dünyaya bəyan edildi. Şuşada, Qubadlıda, Laçında, Füzulidə, Cəbrayılda, Zəngilanda, Kəlbəcərdə, işğaldan azad edilən neçə-neçə şəhər və kəndlərimizdə yenidən ucaldılan üçrəngli bayrağımız düşmənə gözdağı oldu. 44 günlük Vətən müharibəsindəki döyüşlərdə şəhidlərimizin qəhrəmanlığı, qazilərimizin, xalqımızın, dövlətimizin, şanlı ordumuzun şücaəti yeniyetmə gənclərimiz üçün əsl vətənpərvərlik nümunəsi kimi tarixə qızıl hərflərlə yazıldı.
Azərbaycan 30 ilə yaxın müddətdə münaqişənin sülh yolu ilə, beynəlxalq hüquq çərçivəsində, Birləşmiş Millətlər Təşkilatının (BMT) 4 qətnaməsinə uyğun olaraq həll olunmasına ciddi səylər göstərdi. Ermənistanın hərbi-siyasi rəhbərliyinin daha da azğınlaşmasına və mülki əhalimizə qarşı hücumlara artıq dözmək mümkün olmadı. Səbri tükənmiş Azərbaycan Ali Baş Komandan, Prezident İlham Əliyevin rəhbərliyilə, BMT- Nizamnaməsinin 51-ci maddəsini əsas tutaraq, (BMT Nizamnaməsinin 51-ci maddəsi ilə dövlətlərə verilən özünümüdafiə hüququ verilib) 30 ilə yaxın işğal altında qalan Qarabağ torpaqlarının azad edilməsi üçün "Dəmir Yumruq" əməliyyatına start verdi. Ermənistanın hərbi-siyasi rəhbərliyi Azərbaycan Silahlı Qüvvələrinin hərbi manevrləri qarşısında diz çökməyə, kaputiliyasiya aktı imzalamağa məcbur oldu.
2020-ci ilin 27 sentyabr Azərbaycan tarixinə Anım günü kimi yazıldı. Bu gün zəfərimizin başlanğıcı oldu. Vətən müharibəsinin ilk günündən dinindən və irqindən asılı olmayaraq hər kəs Ali Baş Komandana və Azərbaycan Ordusuna həmrəylik nümayiş etdirərək Ermənistanın 30 il işğal altında saxladığı Azərbaycan torpaqlarını azad etmək, günahsız insanların intiqamını almaq üçün ölüm-qalım savaşına qalxdı.
Vətən savaşında ilk azad edilən Füzuli rayonunun Qaraxanbəyli kəndində xatirə lövhəsinin qarşısında Prezident İlham Əliyev bir daha qeyd etdi: "Biz öz şəhidlərimizlə fəxr edirik. Qəhrəman əsgər və zabitlərimizlə fəxr edirik. Şəhidlərimizin qanı yerdə qalmadı, biz şəhidlərimizin qanını aldıq. Döyüş meydanında qisasımızı aldıq. Doğma torpaqlarımızı düşməndən azad etdik, ölkəmizin ərazi bütövlüyünü bərpa etdik".
2020-ci il 27 sentyabrında ilk şəhid verdiyimiz yerdə - şəhidlərimizin şərəfinə Füzulinin Qaraxanbəyli kəndi yaxınlığında ucaldılan abidəni ziyarət edərkən xalqımıza müraciət edən ölkə Başçısı deyib ki, biz xoşbəxt nəsilik ki, bu şərəfli missiya üzərimizə düşüb. Xoşbəxt nəsilik ki, biz bu tarixi hadisənin həm şahidləriyik, həm də iştirakçılarıyıq. Bizdən sonra gələn nəsillər həmişə bu şanlı tarixlə fəxr edəcəklər. Biz fəxr edirik ki, bu torpağın övladlarıyıq. Fəxr edirik ki, döyüş meydanında öz haqqımızı bərpa etdik, düşməni məğlub etdik və bundan sonra biz müzəffər xalq kimi, qalib ölkə kimi əbədi yaşayacağıq.
Anım günündə Ali Baş Komandan, Prezident İlham Əliyevin Füzuliyə səfəri həm də şəhidlərimizin ruhuna ehtiramın göstəricisi idi. 2 il əvvəl Ermənistanın növbəti hərbi təxribatlarından sonra başlanan 44 günlük Vətən müharibəsi Prezident cənab İlham Əliyevin qətiyyətinin, Azərbaycanın yüksəlişinin, ordumuzun yüksək döyüş qabiliyyətinin təcəssümü oldu. Azərbaycanın tarixi Zəfəri ilə başa çatan Vətən müharibəsi yalnız müasir müstəqilliyimizin deyil, bütün dövlətçilik salnaməmizin ən böyük hadisələrindən biri kimi gələcəyimizə işıq saldı, Azərbaycanın müasir tarixində yeni dövrün başlanğıcı oldu.
Hər birimiz Azərbaycanın müstəqilliyi, ərazi bütövlüyü uğrunda qəhrəmanlıqla vuruşan, xalqımızın azadlığını hər şeydən uca tutan, bu yolda həyatını qurban verərək ən uca zirvəyə - şəhidlik məqamına ucalanların xatirəsini anmağa həmişə borcluyuq. Çünki ərazi bütövlüyü, toxunulmazlığı uğrunda canından keçən Vətən övladları sonsuz sevgi, məhəbbət və ehtirama layiqdirlər.