Xəbərlər
Əhliman Əmiraslanov: Səhiyyəmizin bugünkü inkişafı Ulu öndər Heydər Əliyevin adı ilə bağlıdır
«Artıq bütün dünya qəbul edir ki, müasir Azərbaycan dövlətçiliyinin yaradıcısı Ulu öndər Heydər Əliyevdir. Onun hələ SSRİ-nin tərkibində olduğumuz vaxtlarda Azərbaycanda gördüyü işlər, genişmiqyaslı fəaliyyəti bu gün Azərbaycanın müstəqil bir dövlət kimi yaşamasını təmin edib». Bu fikirləri Milli Məclisin deputatı, Azərbaycan Tibb Universitetinin rektoru, akademik Əhliman Əmiraslanov deyib.
Ə.Əmiraslanov bildirib ki, ölkəmizdə hansı sahəyə nəzər salsaq görərik ki, onun əsası Ulu öndər tərəfindən qoyulub. Ulu öndər Heydər Əliyevin tibb, səhiyyə sahəsinə diqqətindən danışan Ə. Əmiraslanov qeyd edib ki, O, hələ 1970-ci illərdə Azərbaycanda yüksək ixtisaslı kadr hazırlığı barədə fikirləşirdi.
«Ulu öndərin hələ o dövrdə apardığı siyasətin bu gün nə dərəcədə müdrik bir siyasət olduğunu görürük. Heydər Əliyev gənc mütəxəssisləri keçmiş SSRİ-nin səhiyyə müəssisələrinə kadr hazırlığı üçün göndərirdi. Yenidən hakimiyyətə gəldikdən sonra O, yenə də səhiyyəyə, tibb təhsilinə xüsusi qayğı göstərməyə başladı. Səhiyyəmizin bugünkü inkişafı Ulu öndərin adı ilə bağlıdır»- deyə, akademik vurğulayıb.