YENİ AZƏRBAYCAN PARTİYASI

Yeni Azərbaycan Partiyası dünənin, bu günün və gələcəyin partiyasıdır!
ÜZVLƏRİN SAYI : 0
BİZƏ YAZIN

Xəbərlər

2018-ci ildə Azərbaycan xalqı Prezident İlham Əliyevə səs verməklə öz taleyinin sahibi olduğunu sübut etdi

Cavid Osmanov

Yeni Azərbaycan Partiyası İdarə Heyətinin üzvü, Milli Məclisin deputatı

2018-ci il aprelin 11-də keçirilmiş növbədənkənar Prezident Seçkiləri Azərbaycan Respublikası Prezidenti postuna keçirilən sayca 8-ci rəsmi seçkidir. Səkkiz namizədin iştirak etdiyi seçki marafonunda Yeni Azərbaycan Partiyasının namizədi, partiyanın Sədri cənab İlham Əliyev olmuşdur. Səsvermə hüququna malik olan vətəndaşların 74.3 %-nin iştirak etdiyi seçkilər şəffaf, azad, demokratik şəraitdə keçirilmiş və cənab İlham Əliyev Azərbaycan seçicilərinin mütləq əksəriyyətinin – 86,02 faizinin səsini qazanaraq Azərbaycan Respublikasının Prezidenti seçilmişdir. Azərbaycan xalqı bu seçkilərdə görülən işlərə yüksək qiymət verməklə bərabər inkişafa, tərəqqiyə, təhlükəsizliyə, gələcəyə səs vermişdir. Yerli və beynəlxalq təşkilatlar tərəfindən həm seçkilərdən əvvəl keçirilmiş rəy sorğuları, həm də seçkilər günü keçirilmiş “exit-poll”lar seçkilərin rəsmi nəticələri ilə üst-üstə düşmüşdür. Bu, bir daha onu göstərir ki, seçkilər xalqın iradəsini əks etdirir.

Xalqın seçimini Prezident cənab İlham Əliyevin xeyrinə müəyyən etmiş amilləri sadalamaqla bitməz. Cənab İlham Əliyevin prezidentliyi dövründə ölkəmiz böyük inkişaf yolu keçmiş, Azərbaycan dövlətçiliyinin əsasları ciddi şəkildə möhkəmlənmiş, dövlətimiz güclənmiş, onun qüdrəti və iqtisadiyyatı daha da artmış,  Azərbaycanın beynəlxalq müstəvidə mövqeyi xeyli dərəcədə güclənmişdir. 2003-2018-ci illər ərzində Prezident cənab İlham Əliyevin rəhbərliyi altında həyata keçirilən xarici siyasət və nəticəyə hesablanmış diplomatik uğurlar Azərbaycanın BMT, Avropa Şurası, ATƏT, NATO və bütün digər nüfuzlu beynəlxalq təşkilatların yüksək tribunasından daha qətiyyətlə çıxış etməsi və bir çox məsələlərdə beynəlxalq aləmin onun rəyinə hörmətlə yanaşması üçün münbit şərait yaratmışdır.  

İnsan amili, xalqın rifahı və milli maraqları siyasətinin strateji prioritetləri hesab edərək “Ancaq iqtisadiyyatı güclü olan ölkələr müstəqil siyasət apara bilərlər” – prinsipini əsas tutan Prezident cənab İlham Əliyev davamlı olaraq iqtisadiyyat sahəsində islahatların təşəbbüskarı kimi çıxış edir. Belə ki, cənab İlham Əliyevin 2003-2018-ci illərdəki Prezidentlik dönəmi tariximizə möhtəşəm iqtisadi yüksəliş dövrü kimi daxil olmuşdur. Bu dövrdə ümumi daxili məhsul 3,2 dəfə, xarici ticarət dövriyyəsi 4,6 dəfə, ixracın həcmi 6 dəfə, büdcə gəlirləri 13,5 dəfə, ölkənin strateji valyuta ehtiyatları isə 26.6 dəfə artmış, maliyyə imkanlarımız əsaslı şəkildə yaxşılaşmışdır. Bundan əlavə, regionlarda ümumi məhsul buraxılışının artımı 3,6 dəfəyə bərabər olmuşdur. Əhalinin nominal gəlirləri 8.6 dəfə, minimum əməkhaqqı  12.9 dəfə, xaricə səfər edən vətəndaşların sayı 2,2 dəfə, əhalinin banklardakı əmanəti 30 dəfə artmışdır. Ölkədə 1 958 400 yeni iş yeri açılmış, işsizliyin səviyyəsi 9,2 faizdən 5 faizə, yoxsulluğun səviyyəsi 44,7 faizdən 5,4 faizə enmiş, 245 min nəfər məcburi köçkün mənzillə təmin olunmuşdur. 2003-2018-ci illər ərzində ölkədə maaşlar təxminən 7 dəfə, pensiyalar 10 dəfədən çox artırılmışdır. Sosial infrastruktur inkişaf etdirilmiş, o cümlədən 3100-dən çox məktəb və 640-dan çox xəstəxana tikilmiş və təmir edilmiş, bölgələrdə 43 Olimpiya İdman Mərkəzi yaradılmışdır. Qeyd olunan rəqəmlər onu göstərir ki, sosial siyasət daim diqqət mərkəzindədir.

Prezident cənab İlham Əliyevin həyata keçirdiyi uğurlu siyasət nəticəsində Azərbaycan 2003-2018-ci illərdə qlobal rəqabətlilik indeksində dünyadakı mövqeyini xeyli gücləndirmişdir. Davos Dünya İqtisadi Forumunun “2017-2018 Qlobal Rəqabətlilik Hesabatında Azərbaycan 35-ci pillədə qərarlaşmış və MDB məkanında liderliyini qoruyub saxlamışdır. Bu dövrdə Azərbaycan dünyada ən çox islahat aparan 10 ölkədən biri kimi tanınıb. Həmçinin, ölkəmiz innovasiya potensialına görə dünyada 44-cü, dövlət orqanlarında İKT-nin tətbiqi üzrə 14-cü olub. Ölkə ərazisində internetin tətbiqi genişləndirilib və internet istifadəçiləri əhalinin 78 faizini təşkil edib. İKT sektorunun iqtisadiyyatda payı 3,7 dəfə artıb. Azərbaycanda yüksək texnologiyalar sürətlə inkişaf etmiş və ölkəmiz dünyanın məhdud sayda üzvü olan kosmik klubuna daxil olmuşdur.

Müasir dünyanın çağırışlarına daha dayanıqlı iqtisadiyyat formalaşdırmaqla cavab verən Azərbaycanda 2003-2018-ci illər ərzində cənab Prezident İlham Əliyev tərəfindən azad sahibkarlığa yaşıl işıq yandırmış, sahibkarlara 2 milyard manatdan çox güzəştli şərtlərlə kreditlər verilmişdir. Bu kreditlər və sahibkarların öz vəsaiti hesabına minlərlə yeni müəssisə yaradılmış və qeyri-neft sektorunun inkişafı təmin edilmişdir.

Prezident cənab İlham Əliyevin həyata keçirdiyi uğurlu enerji siyasəti nəticəsində 2003-2018-ci illərdə iqtisadiyyatın neft-qaz sektoru əsaslı şəkildə inkişaf etmişdir. Ulu Öndər Heydər Əliyevin təməlini qoyduğu Bakı-Tbilisi-Ceyhan neft kəməri 2006-cı ildə istifadəyə verilmiş və ölkə böyük gəlirlər əldə etməyə başlamışdır. 2007-ci ildə istifadəyə verilmiş Bakı-Tbilisi-Ərzurum qaz kəməri Azərbaycanı qaz ixrac edən ölkəyə çevirmişdir. 2014-cü il sentyabrın 20-də “Cənub Qaz Dəhlizi”nin təməli qoyulmuş, 2018-ci il 29 may tarixində Bakıda “Cənub Qaz Dəhlizi”nin, 12 iyun tarixində isə Əskişəhərdə bu dəhlizin mühüm hissəsi olan Trans-Anadolu qaz boru kəmərinin açılışı olmuşdur. Cənub Qaz Dəhlizinə qoyulan sərmayə 40 milyard dollara bərabərdir ki, bu vəsaitin də böyük hissəsi xarici tərəfdaşlar və banklar tərəfindən qoyulmuşdur.

2003-2018-ci illər ərzində Azərbaycan elektrik enerjisini idxal edən ölkədən ixrac edən ölkəyə çevrilmişdir. Həmin illər ərzində ölkədə böyük infrastruktur layihələr reallaşdırılmışdır. Ölkə daxilində enerji təminatı əsaslı şəkildə yaxşılaşmışdır. 30-dan çox elektrik stansiyası tikilmiş, onların generasiya gücü 3900 meqavata çatdırılmışdır.

2003-2018-ci illər yol və nəqliyyat infrastrukturu sürətlə inkişaf etmiş, həmin illər ərzində ölkəmizdə 15 min kilometr yeni yol çəkilişi təmin edilmişdir. Altısı beynəlxalq statusa malik yeddi aeroport tikilmiş, ölkənin dəmir yolu infrastrukturu yenilənmiş, Xəzər dənizində ən böyük yeni ticarət limanın inşası başlanmışdır. Bu illər ərzində ölkədə su təchizatı məsələləri əsasən öz həllini tapmış, dörd böyük su anbarı tikilmiş, kənd təsərrüfatının inkişafı üçün böyük meliorasiya tədbirləri görülmüşdür.

Milli ideya ətrafında xalqı birləşdirən cənab Prezident İlham Əliyev azərbaycançılıq məfkurəsini ölkədə tam bərqərar etməyi bacarmışdır. Cənab İlham Əliyevin 2003-2018-ci illər Prezidentlik dövrü milli maraqların qorunmasına xidmət edən strateji nailiyyətlər dövrüdür və bu illər ərzində Azərbaycan Ordusu sürətlə inkişaf etmiş, təchizat, silah-sursat, texnika, döyüş qabiliyyəti baxımından ordumuz güclü ordular sırasına daxil olmuşdur. Həmçinin, həmin illər ərzində əldə olunmuş iqtisadi inkişaf və aparılan effektiv xarici siyasət nəticəsində Ermənistan bütün regional layihələrdən təcrid olunmuşdur.

2018-ci ildə keçirilmiş seçkilərdə seçicilərin mütləq əksəriyyətinin Prezident İlham Əliyevə səs verməsi, həmçinin xalqın bütün destruktiv və xain qüvvələrə yox deməyinin təzahürüdür. Xalqımız bir daha göstərdi ki, radikallara Azərbaycanın siyasi səhnəsində yer yoxdur. Xarici qrant, ianə hesabına fəaliyyət göstərən, öz dövlətinə qarşı çıxış edən, bir çox hallarda milli satqınlıq nümayiş etdirən ünsürlərə Azərbaycan xalqı bir daha öz yerini göstərdi. Bu səbəbdən də 2018-ci ildə Azərbaycan xalqı Prezident İlham Əliyevə səs verməklə ölkədə aparılan demokratik islahatlara səs verərək öz taleyinin sahibi olduğunu sübut etdi.