Xəbərlər
Azərbaycan həyata keçirdiyi dərin strateji diplomatiya sayəsində dünya siyasətinin cazibə mərkəzlərindən birinə çevirilməkdədir
Hikmət Babaoğlu
YAP İdarə Heyətinin üzvü, Milli Məclisin deputatı
Azərbaycan həyata keçirdiyi dərin strateji diplomatiya sayəsində dünya siyasətinin cazibə mərkəzlərindən birinə çevirilməkdədir. Bunun əsas səbəblərindən biri Prezident İlham Əliyevin dünya siyasətində baş verən qlobal dəyişikləri düzgün qiymətləndirməyi bacarması və bu kontekstdə milli təhlükəsizliyimizi, milli maraqlarımızı yeni çağırışlarla uzlaşdıra bilməsidir. Bu gün Azərabycan yerləşdiyi mürəkkəb coğrafiyanı həyata keçirdiyi mühüm enerji və nəqliyyat layihələri ilə mühüm tərəfdaşlıq məkanına çevirməyi bacarıb. Çindən Londona qədər uzanan Böyük İpək yolunun orta xəttini bir kəmər bir yol layihəsi çərçivəsində reallığa çevirib. Cənubi Qafqazda beynəlxalq hüququn tələblərini yerinə gətirərək ərazi bütövlüyünü təmin edib və uzunmüddətli sülh üçün olduqca əlverişli perspektiv yaradıb. Avrasiya inteqrasiya məkanının mühüm həlqələrindən birinə çevrilib. Bütün bunlar şübhəsiz ki, həm avropalı, həm də asiyalı tərəfdaşlarımızın diqqətini cəlb edir. Hazırda Azərbaycanın ən böyük ticarət tərəfdaşı Avropa İttifaqı ölkələridir. Ancaq buna paralel olaraq ikitərəfli münasibətlərdə də bu ticari tərəfdaşlıq mühüm əhəmiyyət kəsb edir. Bu günlərdə Böyük Britaniya Baş nazirinin Azərbaycan üzrə ticarət elçisi xanım Baronessa Emma Nikolsun, ondan bir qədər əvvəl İtaliya Nazirlər Şurasının sədri Mario Draqinin Azərbaycana səfər etmələri və Prezident İlham Əliyev tərəfindən qəbul edilmələri hazırki mürəkkəb geosiyasi şərtlər çərçivəsində Azərbaycanın etibarlı tərəfdaş kimi əhəmiyyətini göstərmiş olur. Ancaq yeni dünya düzəninin formalaşdığı hazırki tarixi mərhələdə məsələ sadəcə iqtisadiyyat məsələsi deyil, həm də çoxqütblü dünya nizamında milli dövlətlərin yeri, rolu və gələcəyi məsələsidir. Bax bu mühüm proseslərdə Azərbaycan Prezidenti İlham Əliyevin tutduğu mövqe və geostrateji proseslərdə oyandığı rol regionumuz üçün açar mahiyyətini daşıyır. Azərbaycan Prezidenti İlham Əliyev müxtəlif qütblərdə dayanan dövlətlərin liderləri ilə ən mürəkkəb məsələləri müzakirə etməklə ən optimal tərəfdaşlıq platformaları təklif edə bilir. Ona görə də bu gün faktiki olaraq müharibə edən ölkələrin də, bu müharibə kontekstində müxtəlif qütblərdə dayanan ölkələrin liderləri də vaxtaşırı Azərbaycan Prezidenti İlham Əliyevlə dialoq çərçivəsində ən müxtəlif məsələləri müzakirə edirlər. Bu Prezident İlham Əliyevin əsl liderlik keyfiyyətləri və beynəlxalq aləmdə xüsusi nüfuz sahibi olması ilə əlaqədardır.