Xəbərlər
Prezident İlham Əliyev: Əminəm ki, Bakı bundan sonra daha da gözəl şəhər olacaq
Bakı şəhərində mənim sərəncamlarımla yaradılmış xüsusi bir idarəetmə mexanizmi var, - Bakı şəhəri, İçərişəhər və Bulvar, - üç qurum. Əlbəttə, bu qurumlar arasında işgüzar əlaqələr təbii ki, var, olmalıdır və güclənməlidir.
Bu barədə Prezident İlham Əliyev Şahin Seyidzadəni “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri vəzifəsinə təyin olunması ilə əlaqədar videoformatda qəbul edərkən bildirib.
Dövlətimiz başçısı qeyd edib ki, İçərişəhərdə olan insan o qədim məkandan çıxıb bulvara keçməklə tam yeni, müasir bir Bakı görür və bu amillər çox önəmlidir.
Bakının xüsusi idarəetmə mexanizminə daxil olan qurumların bir-biri ilə sıx əlaqədə fəaliyyət göstərməsinin vacibliyini vurğulayan Prezident deyib: “Çünki Bakı, onun bütün yerləri, hər bir guşəsi bizim üçün doğmadır, əzizdir. Əminəm ki, Bakı bundan sonra daha da gözəl şəhər olacaq. Bakıda yeni inşa edilən binalar - istər yaşayış binaları, istər ictimai binalar, ticarət obyektləri, iaşə obyektləri ən yüksək memarlıq zövqünə uyğun olmalıdır. Bu işlərə dövlət qurumları nəzarət etməlidir ki, bundan sonra Bakı ancaq gözəlləşsin”.