Xəbərlər
Kürdəmirdə ulu öndər Heydər Əliyevin Anım Günü münasibətilə tədbir keçirilib
Yeni Azərbaycan Partiyası Kürdəmir rayon təşkilatının və Kürdəmir Rayon İcra Hakimiyyətinin birgə təşkilatçılığı ilə ümummilli lider Heydər Əliyevin anım günü münasibətilə “Dahi şəxsiyyət” mövzusunda tədbir keçirilib.
Tədbirdə Kürdəmir Rayon İcra Hakimiyyəti başçısının vəzifəsini müvəqqəti icra edən, YAP Kürdəmir rayon təşkilatı sədrinin səlahiyyətlərini icra edən Ağali Kərimli, Kürdəmir Rayon İcra Hakimiyyəti başçısının müavini Vəsilə Əsgərli, rayon təşkilatının fəalları, ziyalılar iştirak ediblər.
Tədbir ulu öndər Heydər Əliyevin və torpaqlarımızın azadlığı uğrunda canlarını qurban vermiş şəhidlərin əziz xatirəsinin bir dəqiqəlik sükutla yad edilməsi ilə başlayıb.
Tədbiri giriş sözü ilə açan A.Kərimli bildirib ki, ömrünü xalqının firavan yaşamasına həsr etmiş, dünya miqyasında tanınan və əziz xatirəsi hörmətlə yad edilən Ulu Öndər xalqımızın yaddaşında əbədi yaşayacaq. Bu gün Azərbaycan Heydər Əliyevin ideyaları əsasında cənab Prezident İlham Əliyevin rəhbərliyi ilə inkişaf edir, möhkəmlənir.
“Azərxalça” ASC-nin Kürdəmir rayon filialının müdiri, gənc fəal Rauf Abuşov “Heydər Əliyev və Azərbaycan”, şəhər 2 saylı tam orta məktəbin tarix müəllimi Ülviyyə Şükürova “Heydər Əliyev və Azərbaycan təhsili”, Kürdəmir rayon Mədəniyyət Mərkəzinin bədii rəhbəri Sahilə Müseyibova “Milli mədəniyyət və Heydər Əliyev ideyaları”, Xəlsə kənd ümumi orta məktəbin Azərbaycan dili və ədəbiyyat müəllimi Kəmalə Ələkbərova isə “Heydər Əliyev Azərbaycan dilinin ən böyük müdafiəçisi” mövzusunda çıxış edərək Ulu Öndərin xalq və dövlət qarşısında misilsiz xidmətlərindən danışıblar.
