Xəbərlər
Prezident İlham Əliyev Vyetnam Prezidenti Nquyen Fu Çonqa təbrik ünvanladı
Azərbaycan Respublikasının Prezidenti İlham Əliyev Vyetnam Prezidenti Nquyen Fu Çonqa Vyetnam Sosialist Respublikasının müstəqilliyinin 75-ci ildönümü münasibətilə təbrik ünvanladı.
Təbrikdə deyilir: “Azərbaycan ilə Vyetnam arasındakı əlaqələr zəngin tarixə və xoş ənənələrə malikdir. Genişlənən siyasi, iqtisadi və mədəni əlaqələrimiz, qarşılıqlı faydalı əməkdaşlığımız ikitərəfli münasibətlərimizin dinamik inkişafını şərtləndirən amillərdəndir.
İnanıram ki, dövlətlərarası münasibətlərimizin hazırkı yüksək səviyyəsi bütün sahələrdə əməkdaşlığımızın daha da dərinləşdirilməsi üçün möhkəm zəmin olacaqdır.
Bu xoş gündə Sizə cansağlığı, xoşbəxtlik, işlərinizdə uğurlar, dost Vyetnam xalqına daim firavanlıq və rifah diləyirəm”.