Xəbərlər
Vüqar Rəhimzadə: Azərbaycan mətbuatı dövrün tələblərinə uyğun təkmilləşir, modernləşir, prinsipləri isə dəyişməz qalır
«Mətbuat bütün dövrlərdə həqiqət carçısı olmuş, öz missiyasını yüksək səviyyədə yerinə yetirməyə səy göstərmişdir. Milli mətbuatımızın müstəqillik dövründən bəhs edərkən öncə göz önünə müasir müstəqil Azərbaycan dövlətinin qurucusu, ulu öndər Heydər Əliyevin bu istiqamətdə göstərdiyi xidmətlər gəlir. Mətbuatın cəmiyyətdə rolunu önə çəkən Ümummilli Lider onun müstəqil, azad fəaliyyətinin təmin olunması, mövcud problemlərinin həlli istiqamətində davamlı tədbirlər həyata keçirmişdir. Ümummilli Liderin müstəqil Azərbaycana rəhbərliyi illərində dövrün tələblərinə uyğun olaraq atılan addımlar hər sahədə olduğu kimi, mətbuatın da inkişafında özünü qabarıq şəkildə büruzə verirdi. Ulu öndər Heydər Əliyev kütləvi informasiya vasitələri ilə dövlət qurumları arasında səmərəli əməkdaşlıq münasibətlərinin inkişaf etdirilməsi, mətbuatın iqtisadi müstəqilliyinin, jurnalistlərin peşəkarlığının artırılması məqsədilə biri-birindən əhəmiyyətli Fərman və sərəncamlar imzalamışdır. Ümummilli Liderin ən böyük tarixi xidmətlərindən biri də imzaladığı Fərman əsasında mətbuat üzərində senzuranın götürülməsidr. Bu mühüm addım mətbuatın inkişafında yeni bir mərhələnin əsasını qoydu. Məhz bu diqqət və qayğı, azad sözə verilən dəyər ulu öndər Heydər Əliyevi jurnalistlərin yaxın dostu, mətbuatın böyük hamisi kimi tanıtdı və bir daha təsdiq etdi. Ümummilli Lider 2002-ci ildə «Jurnalistlərin dostu» mükafatına layiq görüldü.»
Bu fikirləri «İki sahil» qəzetinin baş redaktoru, Əməkdar jurnalist Vüqar Rəhimzadə KİV-ə açıqlamasında bildirib.
V.Rəhimzadə vurğulayıb ki, bu gün ölkəmizdə söz və mətbuat azadlığı üçün heç bir maneə yoxdur, mətbuat nümayəndələri istənilən mövzu ətrafında öz fikirlərini ifadə edir, fikir azadlığı mövcuddur, bir sözlə cəmiyyətin informasiya tələbatı yüksək səviyyədə ödənilir. Bu gün Azərbaycan mətbu orqanların sayına görə MDB məkanında öz liderliyini qoruyur. Ölkə əhalisinin 85 faizi internet istifadəçisidir. Təbii ki, bu, ölkəmizdə demokratiyanın inkişafının göstəricilərindəndir.
Baş redaktor son 16 ildən artıq dövrdə ulu öndər Heydər Əliyevin siyasi kursunu bütün istiqamətlərdə uğurla davam etdirən möhtərəm Prezidentimiz İlham Əliyevin ölkəmizdə kütləvi informasiya vasitələrinin sərbəst fəaliyyət göstərməsi, jurnalistlərin öz iradələrini, mövqelərini azad şəkildə ifadə etmələri üçün bütün zəruri imkanlar yaradıldığını qeyd edib: «Ulu öndər Heydər Əliyevin həyata keçirdiyi çoxşaxəli islahatlar bu gün cənab İlham Əliyev tərəfindən uğurla davam etdirilir. Modernləşmə, yeniləşmə, dövrün tələblərinə uyğun təkmilləşmə mətbuatdan da yan keçməyib. Mətbuat daim dövlətin diqqət və qayğısı ilə əhatə olunub. 2005, 2010 və 2015-ci illərdə Azərbaycan milli mətbuatının yaranmasının 130, 135, 140 illik yubileylərinin dövlət səviyyəsində qeyd edilməsi, bu münasibətilə Azərbaycan mətbuat işçilərinin təltif edilməsi, fəxri adlar verilməsi, kütləvi informasiya vasitələrinə maliyyə yardımının göstərilməsi jurnalistlərin əməyinə dövlətin yüksək qiymətinin əyani təzaşürüdür. Həmçinin möhtərəm Prezidentimiz İlham Əliyevin 2008-ci il 31 iyul tarixli “Azərbaycan Respublikasında kütləvi informasiya vasitələrinin inkişafına dövlət dəstəyi Konsepsiyasının təsdiq edilməsi haqqında” sərəncamı, bu sənədə uyğun olaraq Azərbaycan Respublikası Prezidentinin yanında Kütləvi İnformasiya Vasitələrinin İnkişafına Dövlət Dəstəyi Fondunun yaradılması da təsdiqləyir ki, mətbuata göstərilən qayğı davamlı və sistemli xarakter daşıyır. Ulu öndər Heydər Əliyevin siyasi kursunu bütün istiqamətlərdə uğurla davam etdirən Prezident İlham Əliyev jurnalistlərin dostu, mətbuatın hamisi kimi dəstəyini də davamlı edir və bu, media ictimaiyyəti tərəfindən yüksək dəyərləndirilir, onlarda məsuliyyət hissini daha da artırır. Dövlətimizin başçısı İlham Əliyevin son 16 ildən artıq dövrdə 3 dəfə «Jurnalistlərin dostu» mükafatına layiq görülməsi də deyilənlərin təsdiqidir.»
V.Rəhimzadə qeyd edib ki, Azərbaycan dövlətinin iqtisadi qüdrətinin artması KİV-in və jurnalistlərin problemlərinin həlli istiqamətində mühüm tədbirlərin həyata keçirilməsindən də aydın görünür. Belə ki, Prezident İlham Əliyevin dünyada analoqu olmayan addımı - mətbuat işçilərinin mənzil probleminin həll edilməsi ilə bağlı sərəncamları ölkə ictimaiyyəti tərəfindən böyük rəğbətlə qarşılanmışdır: «bu istiqamətdə ilk Sərəncam 2010-cu ildə imzalanaraq 2013-cü ildə birinci bina jurnalistlərin ixtiyarına verildi. Həmin gün növbəti Sərəncam imzalandı və ikinci binanın təməli qoyuldu. Atılan bu addımların davamlı olacağı dövlətimizin başçısı İlham Əliyevin 2017-ci ildə ikinci binanın açılışında söylədiyi “Mən həmişə çalışmışam və çalışıram ki, jurnalistlərə öz dəstəyimi göstərim. Mənim jurnalistlərlə çoxsaylı görüşlərim, səmimi söhbətlərim bunu göstərir. Xüsusilə jurnalistlər üçün binaların tikilməsi də bu siyasətin bir təzahürüdür. Bu təşəbbüs bir neçə il bundan əvvəl irəli sürülmüşdü, jurnalistlər belə məsələ qaldırmışdılar, mən də buna müsbət reaksiya verdim və nəticə etibarilə artıq biz burada ikinci binanın açılışını qeyd edirik. Xatırlayıram, 4 il bundan əvvəl birinci binanın açılışında mən demişdim ki, yəqin gələcəkdə bu əraziyə “Jurnalistlər şəhərciyi” deyiləcək və bu, belə də oldu. Artıq bu gözəl yer “Jurnalistlər şəhərciyi”dir, burada üçüncü bina da tikiləcək. Əlbəttə ki, biz jurnalistlərin məişət problemlərinin həlli üçün gələcəkdə əlavə tədbirlər görəcəyik» fikirlərində də öz aydın ifadəsini tapmışdır. Artıq bu il üçüncü binanın istifadəyə verilməsi nəzərdə tutulur. Dövlətimizin başçısı İlham Əliyev daim bildirir ki, azad mətbuatın inkişafında bundan sonra da fəal olacaq.»
Vüqar Rəhimzadə dövlətin mətbuata diqqət və qayğısı ilə yanaşı, jurnalistlərin üzərinə düşən vəzifələrdən də danışıb. Bildirib ki, müharibə şəraitində yaşayan ölkənin mətbuatı həqiqətlərimizin təbliğində, düşmənlə ideoloji mübarizədə fəal iştirak etməli, milli maraqlarımızı yüksək səviyyədə qorumalı, birlik, həmrəylik nümayiş etdirərək ölkəmizə qarşı qərəzli mövqedə dayanan dairələrin əks təbliğatını reallıqlarımızla cavablandırmalıdır.
Dünyanı bürüyən pandemiyaya qarşı mübarizə tədbirlərinin gücləndirildiyi bir zamanda dövlətimizin başçısı İlham Əliyevin «Azərbaycan milli mətbuatının 145 illik yubileyinin keçirilməsi haqqında» Sərəncamını mətbuata diqqət və qayğının ən yüksək səviyyədə olması ilə əsaslandıran baş redaktor bu dövrdə də mətbuatın üzərinə böyük məsuliyyət düşdüyünü vurğulayıb: «Maarifləndirmə işinin lazımi səviyyədə qurulması üçün yazılı və elektron KİV-lər daha fəal olmalı, Azərbaycan dövlətinin koronavirusa qarşı mübarizə tədbirlərində üstünlük verdiyi özünütəcrid qaydalarının təbliğinə öz davamlı töhfələrini verməlidir. Azərbaycan pandemiya dövründə nəinki daxildə, eyni zamanda, beynlxalq səviyyədə atdığı addımları ilə diqqət çəkir. Bu addımların əsl mahiyyətini, Azərbaycanın beynəlxalq aləmdə artan rolunun və mövqeyinin göstəricisi olduğunu geniş şəkildə təbliğ etməliyik. Azərbaycan müstəqil siyasəti ilə beynəlxalq birliyin fəal üzvünə çevrilib. Bu gün ölkəmizə hansı sahədən baxsaq, böyük inkişafın, tərəqqinin şahidi olarıq.»
V.Rəhimzadə hazırda yeganə problemimizin Ermənistan-Azərbaycan Dağlıq Qarabağ münaqişəsi olduğunu önə çəkərək, diqqəti son günlər Azərbaycan-Ermənistan sərhədinin Tovuz istiqamətində Ermənistan silahlı qüvvələrinin törətdiyi təxribata, Azərbaycan Ordusunun bu təxribatın qarşısını qətiyyətlə almasına yönəldib: «Növbəti qələbəmiz bir daha bu əminliyə əsas verir ki, diplomatik mübarizədə qələbə qazanan Azərbaycan hərb yolunu seçərsə, rəşadətli ordusunun gücü, qüdrəti sayəsində işğal altında olan torpaqlarını azad etmək iqtidarındadır. Bu gün mətbuatın qarşısında dayanan əsas vəzifələrdən biri məhz infomasiya təhlükəsizliyini qorumaqla, müasir dövrün imkanlarından maksimum istifadə edərək həqiqətlərimizi, ermənilərin iç üzünü bir daha dünya ictimaiyyətinə çatdırmaqdır. Həmkarlarıma qələbə sevincimizin müjdəçisi olmağı, modernləşmə, obyektivlik, kreativlik, qabaqcıl texnologiyaların tətbiqi kimi prinsipləri hər zaman fəaliyyətlərinin önündə saxlayaraq dövlətçiliyimizin möhkəmləndirilməsinə töhfələrinin davamlılığını arzulayıram. Azərbaycan Respublikasının Birinci vitse-prezidenti Mehriban xanım Əliyevanın Ermənistanın Azərbaycan-Ermənistan dövlət sərhədinin Tovuz rayonu istiqamətində törətdiyi hərbi təxribatlarla bağlı xalqımıza müraciətində vurğuladığı kimi, hər birimizin borcu Azərbaycanın mövqeyini müdafiə etməkdir. Nəinki döyüş meydanında, həm də kompyuter qarşısında. Unutmayaq ki, bu gün biz bir amalımız olan millət, xalqıq. Bizə zəfər lazımdır. Hamımız üçün bir qələbə. Qalib gələn isə gücü birlik, ağıl və iradə ilə möhkəmlənən olur.»