Xəbərlər
Deputatlığa namizəd Anar İsgəndərov Masallı rayonu Hişkədərə kəndində seçicilərlə görüş keçirib
71 saylı seçki dairəsindən YAP-ın deputatlığa namizədi Anar İsgəndərov Masallı rayonu Hişkədərə kəndində seçicilərlə görüş keçirib.
Görüşü YAP Masallı rayon təşkilatının sədri Seyfəddin Əliyev açaraq deputatlığa namizəd haqqında ətraflı məlumat verib.
Görüşdə çıxış edən A.İsgəndərov parlament seçkilərində Milli Məclisin deputatı seçilərsə görəcəyi işlərdən, rayon üçün inkişaf proqramının həyata keçirilməsi ilə bağlı daim çalışacağından danışıb. Millət vəkili olmağın şərəfli olduğunu qeyd edən deputatlığa namizəd seçicilərin etimadını qazanacağı təqdirdə insanların qayğıları ilə yaşayıb onların fikirlərini, təkliflərini parlament tribunasından səsləndirəcəyini bildirib: “Bu səbəbdən də çalışacam ki, seçki prosesində çox fəal olum, sizinlə davamlı görüşüm, fikirlərinizi öyrənim, problemlərinizin sizinlə birlikdə, sizin iştirakınızla həll edilməsinə səy göstərim”.
O, Yeni Azərbaycan Partiyasının seçki platforması və öz fəaliyyəti barəsində məlumat verərək qeyd edib ki, partiyamızın Sədri, cənab Prezident İlham Əliyevin rəhbərliyi ilə həyata keçirilən siyasət nəticəsində dövlətimiz yeni inkişaf mərhələsinə qədəm qoyub: “Aparılan uğurlu islahatlar nəticəsində dövlətimiz gündən-günə inkişaf edir, iqtisadiyyatımız güclənir, insanların rifah halı yaxşılaşır. Təbii ki, bütün bunlara görə Prezidentimiz cənab İlham Əliyevə təşəkkür edirik. Şübhə yoxdur ki, bu inkişaf qarşıdakı illərdə daha da artacaq”.
A.İsgəndərov seçiciləri 9 fevral seçkilərində fəal olmağa və YAP-ın namizədlərinə səs verməyə çağırıb.
Seçicilərdən Vəfa Kərimova, Söhrab Ağayev, Nahid Məmmədov və başqaları çıxış edərək parlament seçkilərində YAP-ın namizədinə səs verəcəklərini bildiriblər.
