Xəbərlər
İqtisadi İslahatların Təhlili və Kommunikasiya Mərkəzi ABŞ-ın Beynəlxalq Anlaşma üçün İşgüzar Şurası ilə əməkdaşlıq edəcək
İqtisadi İslahatların Təhlili və Kommunikasiya Mərkəzi (İİTKM) və ABŞ-ın Beynəlxalq Anlaşma üçün İşgüzar Şurası (BCIU) arasında əməkdaşlığa dair memorandum imzalanıb.
İİTKM-nin mətbuat xidmətindən bildiriblər ki, memorandumu mərkəzin icraçı direktoru Vüsal Qasımlı və BCIU-nun vitse-prezidenti Cefri Donald imzalayıb.
Memorandum İİTKM və BCIU arasında dostluq və əməkdaşlıq əlaqələrinin daha da genişləndirilməsi, iki ölkə arasında ticarət və investisiyaların təşviqi və biznes fəaliyyəti üzrə daha asan və əlverişli mühit yaratmaq məqsədi daşıyır. Sənədə əsasən birgə beynəlxalq layihələrin həyata keçirilməsi, beynəlxalq tədbirlərin təşkili, Rəqəmsal Ticarət Qovşağı kimi Azərbaycanın mövqeyinin gücləndirilməsi və daha rahat biznes mühitinin yaradılması məqsədilə "Azexport" və Rəqəmsal Ticarət Qovşağı üzrə mütəxəssis mübadilələrinin həyata keçirilməsi, hər iki tərəfin təşkil etdiyi tədbirlərdə, təhsil proqramlarında, təlimlərdə və ixtisaslaşdırılma kurslarında iştirakı nəzərdə tutulur.
Memorandum İİTKM və BCIU-nun birgə təşkilatçılığı ilə Bakıda keçirilən "Azərbaycan Rəqabətlilik Forumu 2018" çərçivəsində imzalanıb.