Xəbərlər
Milli Məclisin deputatları Gürcüstan parlamentinin spikeri ilə görüşüb
Azərbaycan-Gürcüstan parlamentlərarası əlaqələr üzrə işçi qrupunun nümayəndə heyəti Gürcüstanda səfərdədir. Mayın 14-də işçi qrupun rəhbəri Əflatun Amaşovun başçılıq etdiyi nümayəndə heyəti Gürcüstan parlamentinin sədri İrakli Kobaxidze ilə görüşüb.
Görüşdə Azərbaycan və Gürcüstan arasında münasibətlər və parlamentlərarası əlaqələr müzakirə olunub. Əflatun Amaşov hər iki ölkənin əlaqələrinin davamlı olaraq inkişaf etdiyini deyərək parlamentlər arasında olan əməkdaşlıqdan da məmnunluğunu ifadə edib. O həmçinin bu əməkdaşlığın daha da genişləndirilməsi potensialının olduğunu diqqətə çatdırıb.
İ. Kobaxidze görüşdən məmnunluğunu ifadə edərək Gürcüstan və Azərbaycanın strateji tərəfdaş olduğunu qeyd edib. Spiker Gürcüstanın Azərbaycanın ərazi bütövlüyünü dəstəklədiyini və ikitərəfli münasibətlərə böyük önəm verdiyini bildirib.
Görüşdə iki ölkənin parlamentləri arasında əlaqələrin daha da gücləndirilməsi dair fikir mübadiləsi aparılıb.
Qeyd edək ki, nümayəndə heyətinin tərkibinə Əflatun Amaşov, Hikmət Babaoğlu, Kamilə Əliyeva, Pərvin Kərimzadə, Naqif Həmzəyev və Rasim Musabəyov daxildir. Mayın 16-dək davam edəcək səfərdə nümayəndə heyətinin Gürcüstanın bir sıra rəsmi şəxsləri ilə görüşləri nəzərdə tutulur.