Xəbərlər
Ağacan Abiyev: Azərbaycanda idmanın inkişafı dövlətin əsas diqqət ayırdığı məsələlərdən biridir
«Bu gün Azərbaycanda idmanın inkişafı dövlətin əsas diqqət ayırdığı məsələlərdən biridir». Bu fikri Milli Məclisin deputatı Ağacan Abiyev deyib.
A.Abiyev bildirib ki, ölkəmizdə gənclərin inkişafına həsr olunan Dövlət proqramlarında, konsepsiyalarda idmanın inkişafı məsələsi prioritet olaraq müəyyənləşdirilir. Onun sözlərinə görə, gənclər arasında maarifləndirmə işinin aparılması, onların idmana cəlb olunması bu məsələdə əsas xətt sayılır.
«Beynəlxalq təcrübədən bəllidir ki, müəyyən bir sektorun inkişafı o sahənin maddi-texniki vəziyyətinin yaxşılaşdırılması və intellektual, yenilikçi kadr potensialının yetişdirilməsindən asılıdır. Azərbaycanda da Prezident İlham Əliyevin təşəbbüsü ilə ölkəmizin hər bir bölgəsində müasir idman komplekslərinin tikilərək yeniyetmələrin, gənclərin ixtiyarına verilməsi respublikamızda idmanın inkişafını təmin edib. Bir-birini əvəzləyən idman yarışları Bakının daha böyükmiqyaslı yarışlara ev sahibliyi etmək imkanlarını artırıb. Ölkəmizin Avropa Oyunları, İslam Həmrəyiliyi Oyunları kimi möhtəşəm idman yarışlarına ev sahibliyi etməsinin əsasında da məhz Azərbaycanın inkişafı, müasir infrastrukturu və təhlükəsiz ölkə olması amili dayanırdı. Bu baxımdan, ölkəmizin gələcəkdə daha böyük uğurlara imza atacağı şübhəsizdir»- deyə, A.Abiyev vurğulayıb.