YENİ AZƏRBAYCAN PARTİYASI

Yeni Azərbaycan Partiyası dünənin, bu günün və gələcəyin partiyasıdır!
ÜZVLƏRİN SAYI : 0
BİZƏ YAZIN

Xəbərlər

Türkiyədəki Azərbaycan diaspor təşkilatları beynəlxalq təşkilatlara bəyanat ünvanlayıblar

Türkiyədə fəaliyyət göstərən Azərbaycan diaspor təşkilatları beynəlxalq təşkilatlara bəyanat ünvanlayıblar.

Diasporla İş üzrə Dövlət Komitəsinin mətbuat xidmətindən verilən məlumata görə, Türkiyədə yaşayan həmvətənlərimiz tərəfindən son günlər Ermənistan-Azərbaycan dövlət sərhədinin və qoşunların təmas xəttinin müxtəlif istiqamətlərində vəziyyətin gərginləşməsi, Ermənistan silahlı qüvvələrinin atəşkəsi pozaraq Azərbaycana qarşı təxribat törətmələri ciddi narahatlıqla qarşılanıb. Həmvətənlərimiz adından Türkiyədə fəaliyyət göstərən diaspor təşkilatlarımız beynəlxalq təşkilatlara bəyanatlar ünvanlayaraq onları Ermənistana qarşı sanksiyalar tətbiq etməyə çağırıblar.

Türkiyə-Azərbaycan Dostluq Dərnəkləri Federasiyasının İğdır Azərbaycan Evi Dərnəyinin sədri Sərdar Ünsal Ermənistan silahlı qüvvələrinin təxribatları nəticəsində Azərbaycan əsgərlərinin şəhid olması və dinc sakinlərin öldürülməsi ilə bağlı bəyanatla çıxış edib. Bəyanatda bildirilir ki, Ermənistanın bu hücumu qarşılıqsız qalmayacaq və Azərbaycan Ordusu tərəfindən layiqli cavabını alacaqdır.

Bununla yanaşı, Türkiyə Azərbaycan Dərnəkləri Federasiyası (TADEF) da cəbhədəki gərginliklə əlaqədar beynəlxalq təşkilatlara ünvanlanmış bəyanat qəbul edib. Bəyanatda Ermənistanın Azərbaycan torpaqlarını işğal etməsi, azərbaycanlılara qarşı həyata keçirdiyi qətliyam və soyqırımlara beynəlxalq təşkilatlar və qeyri-hökumət təşkilatları tərəfindən heç bir siyasi, hüquqi qiymət verilməməsi və dünya ictimaiyyətinin hələ də bu məsələyə laqeyd qalması pislənilir.