Xəbərlər
Vüsal Quliyev: Bu gün ölkəmizin ictimai-siyasi həyatında multikulturalizmə böyük önəm verilir
«Azərbaycan dünyada enerji resursları ilə zəngin dövlət olmaqla yanaşı, həm də tolerant və multikultural ölkə kimi tanınır». Bu fikri Azərbaycan Respublikası Prezidenti Administrasiyasının İctimai-siyasi məsələlər şöbəsinin sektor müdiri Vüsal Quliyev deyib.
V.Quliyev bildirib ki, əsrlər boyu bir çox fərqli sivilizasiyaların və mədəniyyətlərin qovuşuğunda yerləşməsi ölkədə multikulturalizmin yaranmasına səbəb olub. Onun sözlərinə görə, Azərbaycanda mövcud milli-mədəni müxtəliflik və etnik-dini dözümlülük mühiti, müxtəlif dinlərin, etnik qrupların nümayəndələrinin sülh, dostluq şəraitində yaşamaları ölkəmizi bənzərsiz məkana çevirib.
«Bu gün ölkəmizin ictimai-siyasi həyatında multikulturalizmə böyük önəm verilir. Ümummilli lider Heydər Əliyevin müdrikliyi nəticəsində multikulturalizm Azərbaycanda dövlət siyasəti elan olunub və bu kurs hazırda Prezident İlham Əliyev tərəfindən uğurla davam etdirilir. Ölkəmizdə əsrlər boyu formalaşmış tolerantlığın, etnik-mədəni, dini müxtəlifliyin qorunmasını və inkişafını təmin etmək, Azərbaycanı dünyada multikulturalizm mərkəzi kimi tanıtmaq və mövcud multikultural modellərini tədqiq və təşviqi məqsədilə Prezident İlham Əliyev tərəfindən Bakı Beynəlxalq Multikulturalizm Mərkəzi yaradılıb və 2016-cı il respublikamızda “Multikulturalizm ili” elan olunub»- deyə, V.Quliyev vurğulayıb.