Xəbərlər
TAP layihəsi çərçivəsində Albaniyada magistr tələbələri üçün təcrübə proqramına başlanılıb
Azərbaycan təbii qazının Avropaya nəqlini nəzərdə tutan “Trans-Adriatik” (TAP) qaz boru kəməri layihəsinin icrası çərçivəsində Albaniyada magistr tələbələri üçün təcrübə proqramına başlanılıb.
Bu barədə boru kəmərinin operatoru olan TAP AG-nin saytında məlumat verilir. Dörd aylıq təcrübə proqramında tələbələr layihə üzrə əsas şöbələrdə, həmçinin beynəlxalq ekspertlər ilə işləmək və karyera imkanı əldə edəcək. Proqramın icrasına noyabrda başlanılacaq və tələbələr yeddi sahə üzrə təcrübə keçəcəklər.
Qeyd edək ki, Xəzər dənizinin Azərbaycan sektorundakı “Şahdəniz-2” yatağından hasil olunacaq qazın Avropaya daşınmasını təmin edəcək TAP-ın ilkin ötürücülük qabiliyyəti ildə 10 milyard kubmetr olacaq və bu həcmin gələcəkdə 20 milyard kubmetrədək artırılması nəzərdə tutulur. Boru kəmərinin uzunluğu 871 kilometr (Yunanıstan – 547 kilometr, Albaniya – 211 kilometr, Adriatik dənizi – 105 kilometr, İtaliya – 8 kilometr), diametri isə 48 düymdür (sualtı hissə - 36 düym). 2020-ci ilədək layihə üzrə Azərbaycan şirkətlərinin xərclərinin 1,2 milyard dollar olması gözlənilir. TAP üzrə tələb olunan kapital xərcləri 5 milyard dollardır. Boru kəmərinin 2020-ci ildə istismara verilməsi nəzərdə tutulur. Bu il Azərbaycanın TAP layihəsinə 278 milyon dollar ayırması planlaşdırılır.
TAP-ın səhmdarları belədir: BP (20 faiz), SOCAR (20 faiz), “Snam S.p.A.” (20 faiz), “Fluxys” (19 faiz), “Enagás” (16 faiz) və “Axpo” (5 faiz).