Xəbərlər
«Yeni Azərbaycan» referendum üzrə təşviqat qrupu Yasamal rayon şöbəsində keçirilən növbəti görüşün iştirakçıları ilk dəfə səsverəcək gənclər oldu
Ümumxalq səverməsinə hazırlığın təbliğat mərhələsi üzrə seçicilərlə görüşlərini mütəşəkkilliklə davam etdirən «Yeni Azərbaycan» referendum üzrə təşviqat qrupu Yasamal rayon şöbəsində keçirilən növbəti görüşün iştirakçıları ilk dəfə səsverəcək gənclər idi.
Görüşü giriş sözü ilə açan YAP Yasamal rayon təşkilatının sədri Tağı Əhmədov vurğuladı ki, Konstitusiya dəyişiklikləri ilə Azərbaycanın müasir inkişaf tarixi yazılır:
- Konstitusiyamızda olunan dəyişikliklər zamanın tələbi olmaqla qanunlarımızın dinamik inkişafının bu günki tələbinə uyğun təkmilləşdirilməsidir. Yeniliklər, nəzərdə tutulan əlavələr Dövlət Proqramlarının daha çevik, səmərəli tətbiqinin elmi əsaslara uyğun təkmilləşdirilməsinə yönəldilir.
Tağı Əhmədov Konstitusiya islahatları barədə məlumat verərək gənclərin ölkənin ictimai-siyasi həyatında daha fəal iştirakını təmin edəcək yaş senzi ilə əlaqədar yeniliyi dövlətin gənclər siyasətinin davamı kimi dəyərləndirdi.
Azərbaycan Dövlət İqtisadiyyat Universitetinin professoru Rasim Nəbiyev çıxışında dəyişiklikləri iqtisadi baxımdan izah edərək yeniliklərin əhəmiyyəti barədə danışdı, mülkiyyətlə bağlı nəzərdə tutulan sosial yönümlü əlavələri insan amilinə diqqət və qayğı nümunəsi adlandırdı.
YAP Siyasi Şurasının üzvü, partiyanın Gənclər Birliyinin sədri Seymur Orucov ilk dəfə səs verəcək gəncləri konstitusion hüquqlarından istifadə etməyə çağırdı. Konstitusiyaya olunan dəyişikliklərin əhəmiyyəti və mahiyyəti barədə açıqlama verən Seymur Orucov 2009-cu ildə keçirilən referendumdan sonra Azərbaycanın həyatında baş verən yeniliklərdən, qazanılan uğurlardan, ölkəmizin milli müdafiəsinin daha etibarlı təminatı üçün ordu quruculuğu sahəsində aparılan islahatlardan, gənclərin seçib, seçilməsi üçün nəzərdə tutulan yeniliklərdən, idarəetmə sisteminin təkmilləşdirilməsinə yönələn vitse-prezidentlik institutunun verəcəyi səmərədən ətraflı danışdı. Bildirdi ki, təbliğat kampaniyasına «Həmrəy olaq, «HƏ» deyək çağırış ilə bağlayan «Yeni Azərbaycan» təşviqat qrupunun hər bir üzvü ilə birlik nümayiş etdirən gənclər 26 sentyabrda seçki məntəqələrinə gəlməklə daha qüdrətli Azərbaycan naminə vətəndaşlıq mövqelərini Konstitusiyamıza olunan dəyişiklikləri dəstəkləməklə nümayiş etdirəcəklər.
