YENİ AZƏRBAYCAN PARTİYASI

Yeni Azərbaycan Partiyası dünənin, bu günün və gələcəyin partiyasıdır!
ÜZVLƏRİN SAYI : 0
BİZƏ YAZIN

Xəbərlər

VIII Yay Hərbi Oyunlarının Azərbaycanda keçirilməsi ilə bağlı müraciət müzakirə olunub

Beynəlxalq Hərbi İdman Şurasında (CISM) ölkəmizi təmsil edən nümayəndə heyətinin rəhbəri, Milli Olimpiya Komitəsinin İcraiyyə Komitəsinin üzvü general-mayor Natiq Əliyev Şuranın rəsmi nümayəndəsi Nevzat Varol ilə görüşüb.

Müdafiə Nazirliyinin mətbuat xidmətindən bildiriblər ki, görüşdə CISM prezidenti Abdul Hakeem Al-Şinonun VIII Yay Hərbi Oyunlarının Azərbaycanda keçirilməsi ilə bağlı müraciəti müzakirə olunub.

Azərbaycan Milli Olimpiya Komitəsinin prezidenti İlham Əliyevin idmanın inkişafına verdiyi dəstək nəticəsində ölkəmizin birinci Avropa Oyunlarına, bu günlərdə isə Bakıda keçirilən Formula-1 Avropa Qran-pri yarışına və gələn il IV İslam Həmrəylik Oyunlarına ev sahibliyi etməsi xüsusi vurğulanıb.

Dünya hərbçiləri arasında 2004-cü ildə cüdo, 2006-cı ildə güləş, 2008-ci ildə boks, 2013-cü ildə isə futbol üzrə dünya çempionatlarının və 2010-cu ildə CISM Avropa konfransının Azərbaycanda uğurla keçirilməsini xatırladan N.Varol təmsil etdiyi qurum adından Azərbaycan tərəfinə bir daha minnətdarlığını bildirib.

Görüşdə Azərbaycanın hərbçi idmançılarının CISM himayəsi altında keçirilən yarışlarda qazandıqları nailiyyətlər və beynəlxalq səviyyəli idman yarışlarını təşkil etmək təcrübəsi nəzərə alınaraq, 2023-cü ildə VIII Yay Hərbi Oyunlarının ölkəmizdə keçirilməsi təşəbbüsü müzakirə olunub.