Xəbərlər
“Günəşli” və “Neft Daşları”ndakı qəzalarda həlak olmuş neftçilərin xatirəsini əbədiləşdirən abidə qoyulacaq
Ötən il dekabrın 4-də təbii fəlakət nəticəsində “Günəşli” yatağındakı 10 və “Neft Daşları”ndakı 501 nömrəli dəniz özüllərində baş vermiş qəza zamanı həlak olmuş neftçilərin xatirəsinin əbədiləşdirilməsi üçün abidə qoyulacaq.
SOCAR-ın mətbuat xidmətindən bildirilib ki, bu barədə martın 17-də şirkətin prezidenti Rövnəq Abdullayevin qəza zamanı itkin düşmüş neftçilərin ailə üzvləri ilə keçirdiyi görüşdə məlumat verilib. Görüşdə əvvəlcə həlak olan və itkin düşən neftçilər anılıb.
R.Abdullayev Xəzər dənizində bu cür təbii fəlakətlərin çox nadir hallarda baş verdiyini qeyd edib, qəzadan dərhal sonra Azərbaycan Respublikası Prezidentinin Sərəncamı ilə Dövlət Komissiyasının yaradıldığını bildirib. O, ötən müddət ərzində komissiyanın rəhbərliyi altında görülmüş tədbirlərdən danışıb, həlak olan və itkin düşən neftçilərin axtarış işlərinin fasilə verilmədən aparıldığını və son cəsədlərin tapıldığı Türkmənistan Respublikası ərazisində axtarış işlərinin intensivləşdirilməsi ilə bağlı zəruri tədbirlərin həyata keçirildiyini diqqətə çatdırıb.
Bu hadisənin SOCAR ailəsinə daxil olan çoxminli neftçiləri dərindən sarsıtdığını söyləyən şirkətin prezidenti həlak olan və itkin düşənlərin bütün neftçilər tərəfindən bir an da olsun unudulmadığını vurğulayıb, onların ailə üzvlərinə qayğı göstərilməsinin daim diqqət mərkəzində saxlanıldığını qeyd edib. Bu görüşün də onların qayğı və problemləri ilə maraqlanmaq məqsədi daşıdığını diqqətə çatdırıb. Qəzada xilas edilmiş neftçilərin müalicə-reabilitasiyasına da hərtərəfli dəstək verilməsinə toxunan R.Abdullayev dövlətimizin başçısı İlham Əliyevin göstərişlərinə əsasən, zərər çəkmiş bütün insanların sosial təminatları ilə bağlı məsələlərin bundan sonra da diqqətdə saxlanılacağını vurğulayıb.
İtkin düşənlərin ailə üzvləri ilə SOCAR-ın rəhbərliyi nümayəndələrinin indiyə qədər keçirilmiş görüşləri haqqında məlumatlı olduğunu bildirən R.Abdullayev görüş iştirakçılarını narahat edən məsələlərlə maraqlanıb, onların arzu və istəklərini dinləyib, sualları cavablandırıb. İtkin düşən neftçilərin ailə üzvlərindən Esmira Əhmədova, Hüseyn Xəlilov, Azər İskəndərov, Nəcməddin Nəcməddinov, Simuzər Rzaxanova və başqaları qarşılaşdıqları problemlərdən söz açmış, bu problemlərin həlli üçün SOCAR-ın rəhbərliyinin köməyinə ehtiyac yarandığını söyləyiblər.
SOCAR-ın prezidenti R.Abdullayev görüşdə qaldırılan məsələlərin həlli istiqamətində şirkət tərəfindən hər cür dəstək göstəriləcəyini qeyd edib, itkin düşənlərin ailə üzvlərinin üzləşdikləri çətinliklərin aradan qalıdırılmasına yardım edilməsinin hər şeydən öncə, vətəndaşlıq borcu olduğunu bildirib. O, dekabrın 4-də təbii fəlakət nəticəsində “Günəşli” yatağındakı 10 və “Neft Daşları”ndakı 501 nömrəli dəniz özüllərində baş vermiş qəza zamanı həlak olmuş neftçilərin xatirəsinin əbədiləşdirilməsi üçün abidə qoyulacağını söyləyib, ölənlərə Allahdan rəhmət, itkin düşənlərin ailə üzvlərinə səbir diləyib.