Xəbərlər
ARDNF-in inzibati binası Britaniya institutu tərəfindən “Yaxşı” dərəcəsi ilə qiymətləndirilib
Azərbaycan Respublikası Dövlət Neft Fondunun (ARDNF) inzibati binası Böyük Britaniyanın Tikinti Tədqiqatları və Ətraf Mühitin Qiymətləndirilməsi Metodologiyası İnstitutu (BREEAM) tərəfindən yeni tikili qiymətləndirmə metodologiyası üzrə “Yaxşı” dərəcəsi ilə qiymətləndirilib.
ARDNF-in ictimaiyyətlə əlaqələr şöbəsindən bildirilib ki, BREEAM institutu 1990-cı ildən etibarən bütün dünyada qəbul edilmiş bir neçə metodologiya üzrə bina və layihələrin qiymətləndirilməsini həyata keçirir. Bura yeni tikili, bərpa və yeniləmə, beynəlxalq qeyri-yaşayış və layihələndirmə metodologiyaları daxildir. Yeni tikili qiymətləndirmə metodologiyası bina inşaatının 3 ayrı mərhələsində - ilkin inşaat işləri tamamlanmış, kommunal və texniki xidmətlərlə təchiz edilmiş və ya tam hazır binalarda tətbiq edilə bilər.
2014-cü il dekabrın 29-da Prezident İlham Əliyevin iştirakı ilə açılış mərasimi keçirilmiş ARDNF-in yeni inzibati binasının tikintisi zamanı BREEAM qiymətləndirilməsindən keçilməsi öncədən qarşıya qoyulan hədəflərdən biri olub. Binanın inşaatı zamanı BREEAM tərəfindən müəyyən edilən tələblər nəzərə alınıb. ARDNF-in inzibati binası Azərbaycanda BREEAM tərəfindən yeni tikili metodologiyası vasitəsilə tam hazır bina mərhələsində “Yaxşı” dərəcəsi ilə qiymətləşdirilən ilk binadır.
ARDNF-in ikimərtəbəli yeraltı dayanacaqla birlikdə 26 mərtəbəli inzibati binasında 3 mərtəbəli podium, icraçı direktorun ofisinin də yerləşdiyi mərtəbə daxil olmaqla 18 açıq tipli ofis mərtəbəsi, 3 texniki mərtəbə və bununla yanaşı kitabxana, muzey, 200 nəfərlik konfrans zalı, iclas otaqları, yeməkxana və sair mövcuddur.